2168/2023-2024

Aizawl, the 5th October, 2023: Agriculture Minister Pu C.Lalrinsanga chuan tukin dar 8 khan Lengpui Vengtharah State Biological Control Laboratory, Mizoram Sawrkar leh NABARD tangkawp sum cheng nuai 273.08 senga din chu khuallian niin a hawng.

Khuallian Agriculture Minister Pu C.Lalrinsanga chuan hlotur hmanga thlai eichhetu tihrem tuma hmalaknain hriselna kawngah nghawng thalo tak a thlen thin thu sawiin, mihring hriselna tura him zawk thlai eichhetu rannungte eichhe let vetu siam chhuahna tur, State Biological Control Laboratory, Lengpui Vengthara hawn a ni chu Mizoram tana mellung pawimawh tak a ni, a ti a. Kum 2019 a Fall Armyworm (FAW) pangang puangin nasa taka Mizoram puma Vaimim chin a nghawng thu sawiin, hemi doletna kalzela pangang thahna Biological Control Agent tangkai zia hriatchhuah belh a nih hnuah ICAR-NBAIR, Bengaluru nena thawhhona hnuaiah State Biological Control Laboratory hi din a lo ni ta a ni, a ti a. A puitlin theih nana ICAR-NBAIR Bengaluru, Department thawktute leh khawtlang hruaitute thahnemngaihna fakawm tiin, Laboratory tihchangtlun leh enkawl kawngah lungrual taka thawhho zel a beisei thu a sawi bawk.

Pu C.Lalrinsanga chuan ei leh in kaltlanga taksa tichhe theitu hrang hrangte ven kawngah hmalak mek zel a nih thu sawiin, Biological Control Laboratory hawn thar chuan thlai enkawlna kawngah leh ei leh bar hrisel thar chhuah kawngah awmze thui tak a nei dawn a ni, a ti a. Kuthnathawktute thlengpha tur biocontrol agent duhkhawp siam chhuah a nih theih hunah chuan hlotur hman pawh tihtlem tial tial beisei a nih thu a sawi a. A hmaa biocontrol agent 3 dawn tawh bakah bio-control agent 7 dang ICAR-NBAIR, Bengaluru atanga dawn a ni leh chu lawmawm a tih thu sawiin, hengte hi Laboratory-ah hian tihpun a ni dawn a, thlai eichhetu rannung hrang hrangte thah nan tangkai taka hman tum a ni, a ti bawk.

Thusawitu dang Dr. K.Subaharan, HoD, CGU, Indian Council of Agriculture Research-National Bureau of Agricultural Insect Resources (ICAR-NBAIR), Bengaluru chuan State Biological Control Laboratory bultan pui mai bakah kawng engkima puih chhunzawm zel an tum thu a sawi a. A hlawhtlinna tura hmalak chu Mizoram Sawrkar mai nilo, ICAR-NBAIR Bengaluru mawhphurhna a nih tel thu sawiin, kaihhruai leh tawiawm an ngaih hun apianga puibawmtu tur Nodal Officer ruat an nih tawh thu leh mamawh hun apianga che chhuak tura an inpeih reng thu a sawi bawk.

He hun hi Agriculture Secretary Pu H.Lianzela'n kaihruaiin inlawmna thu a sawi a. Rev. R.C Lalchhuanthanga'n hunserh a hmang a. Dr. Samuel Lalliansanga, Deputy Director, Agriculture Department-in technical report a pe a. Pu JD Traite, DDM, NABARD in NABARD kalphung bakah Mamit District chhunga hmalakna leh hmachhawpte a sawifiah a. Pu Lallawmthanga, VCP Lengpuiin thu a sawi bawk a. Pu James Lalsiamliana, Director, Agriculture Department-in lawmthu sawiin hun hman hi a khar a ni.

State Biological Control Laboratory din nan hian a pumpuiin cheng nuai 273.08 ruahman a ni a, NABARD-RIDF-XXV sum cheng nuai 250.56 leh State Sawrkar atanga ruahman cheng nuai 22.52 sen a ni a. He project hian component pathum Laboratory Building, Type-IV Staff Qrts leh Laboratory bungraw leinate a kengtel a. Lengpui VC in ram an pekah hmalak niin M/s Eastmen Consultancy te'n he hna hi thawkin December ni 1, 2020 khan hna an tan a ni.

State Biological Control Laboratory hi himdam leh hrisel zawka thlai enkawlna tura hmalakna a ni a. Thlai eichhetu rannung hrang hrang (Pangang, Thlangdar, Vual etc.) te tiremtu tur anmahni that thei chi rannung (Parasitoids, Predator leh Biopesticide) leh hrik (Bacteria, Virus -NPV, Entomopathogenic nematodes leh Fungi) te Laboratory a tihpun leh heng Biocontrol Agent-te hi Loneituten uar zawka an hman theih nana tam zawk siam chhuah tum a ni a. Hriselna nghawng pawi thei hlotur hman tihtawp a nih theih nana Loneitute banphaka Biocontrol Agent chhawpchhuah sak leh a hman dan zirtir te, Biological Control-ah hmasawnna a awm theih nana ICAR-NBAIR nena thawhho te, thlai hrisel leh himdam hlawk zawka tharchhuah kawnga hmalakte chu project tum pawimawh takte zinga mi a ni.

He hunah hian Agriculture Department hotute , KVK Lengpui thawktute, khawtlang hruaitute, AMFU, Progressive Farmer leh sawm bik mi pawimawh dangte an tel a ni.