2169/2023-2024

Saitual, the 5th October, 2023 : Vawiin khan 2023 MLA inthlanpui lo awm tura Saitual District chhunga constituency pathuma Flying Squad (FS)- leh Static Surveillance Team te tan Saitual DC Conference Hall-ah training buatsaih a ni.

He hun hi Saitual District Election officer, Dr Lalngura Tlau chuan hmanpuiin, election felfai tak a neih a nih theih nan team hrang hrang din a ni a, chung team te zinga pawimawh tak chu SST leh Flying squad te an ni, a ti a. Inthlan vuakvet ah mi thenkhat duhthawh luat avangin dan pel a an kal chang a awm thin a, chung an kalsual na tur laka ven leh lo en thlithlai a, a tul anga bawhzui ngai te lo bawhzui chu an hna pawimawh tak a ni, a ti. Dr Lalngura tlau chuan training tura kalkhawmte chu an hna an thawhna kawngah dik tak leh hawihhawm taka thawk turin a chah bawk.

He hunah hian Election Officer Pi Laldinfeli MCS leh SDO Sadar Pu Remlalliana Hnamte MCS, NLMT te chuan Flying Squad member-te chu an tih tur leh hnathawh dan tur te an hrilhfiah a, Pu Remlalliana hian training a pe nghal bawk a ni. Flying Squad leh Static Surveillance team training tura lo kal te tan an mamawh leh hriatfiah ngai lai te zawhna leh chhanna hun hman a ni nghal bawk.

Static Surveillance Team (SST)  leh Flying Squad te hi inthlan felfai leh dik tak neih theihna tura hma la tu pawimawh tak anni a. Inthlanna a suma intham leh inlei te, zu emaw, vote lei theihna tur thil dang emaw sem a awm loh nan hma an la thin a,chutiang thil report a awm pawh a bawhzui tu tur anni. Saitual district a AC pathum ahhian Flying Squad leh SST team thum zel an awm a ni.