2171/2023-2024

Champhai the 5th October, 2023 - Champhai zirlaite leh thalaite an hmalam hun kawhhmuhna leh hna hrang hrang chungchang inzirtirna hunpui – ‘Champhai Rahbi – Career Expo & Job Fair’ chu vawiin khan Government Champhai College Multipurpose Hall-ah Champhai DC Pu James Lalrinchhana’n a hawng.

Champhai DC Pu James Lalrinchhana chuan ‘Champhai Rahbi – Career Expo & Job Fair’ chu Champhai District thalaite kawng kawhhmuhtu leh hna hrang hrang chelh chho tura an inpuahchahna kawngah hmanraw pawimawh tak anih ngei a beisei thu sawiin, he program neih anih theihna tura hmalatu Minister Pu TJ Lalnuntluanga leh a huaihawt tu Department-te chungah lawmthu a sawi a. Zirlaite chu tum mumal nei a, chhungkua, khawtlang leh ram tana chhawr tlak nih tum tura chahin, hun lo kal zel turah engtin nge ei an zawn anga, eng kawng nge an zawh dawn tih ngaihtuah chunga rilru nei taka lehkha zir turin a chah a. An educational qualification piah lamah zirlaite chu an thiam zawng leh tui zawnga eizawnna kawng dap thiam te, taimak, tumruh leh teirei peih na te an neih a tul takzet chho dawn a ni, a ti a. Career Expo & Job Fair-a stall hrang hrangte chu uluk taka fang chhuak tur leh an hmalam hun atana hmang tangkai theuh turin zirlaite chu a chah a ni.

‘Champhai Rahbi – Career Expo & Job Fair’ hawnna ah hian GCC thawktute, sawrkar official-te leh zirlai thahnem tak an tel a. Pu P. Lalhmingliana, Principal, Government Champhai College chuan kalkhawmte lawmna thu a sawi a. Pi Ruth Chuauthangpuii, Programme Manager, Mizoram Startup Mission chuan ‘Entrepreneurship & Startup Support’ chungchang zirtirna a pe a, Pu L. Rosangliana, DLEO Champhai chuan ‘Skill Sector Opportunities for youth in Mizoram’ chungchang zirtirna pe in, Pu RK Hnuna, Director, ZoCareer chuan Career Guidance chungchang zirtirna a pe a. Pi Vanlalkhumtiri Chhangte, Research Officer chuan lawmthu sawina hun a hmang a ni.

‘Champhai Rahbi – Career Expo & Job Fair’ hi Mizoram Startup Mission, Planning & Programme Implementation Department, Labour, Employment, Skill Development & Entrepreneurship Department, Mizoram Youth Commission leh Government Champhai College-te tangkawp buatsaih a ni.

Champhai Rahbi hi hnih chhung (5th – 6th October, 2023) a awh dawn a. Government Champhai College Multipurpose Hall bulah hian stall hrang hrang ruahman a ni a. Hotel Management, Nursing, Bestway Network Marketing, Bank hrang hrang, LIC, Mission Foundation Movement, Jay Jay Training & Placement, Suzuki leh Hotel ten stall an siam a. Heng stall-ah te hian hna hrang hrang chungchang inzirtirna leh kawng kawhhmuh mai bakah hna lak leh placement thlengin an ti thei a. Foreign lama hnathawk duh tan te pawh foreign placement thlengin an tanpui thei a. Zirlaite mai bakah Champhai District-a thalai hna zawng mekte leh hetiang lam ngaihven duh te tan naktuk October ni 6, 2023 tlai dar 5 thleng pan theih reng a ni.