4876/2025-2026

Dated Aizawl, the 17th March, 2026 : Vawiin khan Pu P.C. Vanlalruata, Minister, Agriculture & Farmers' Welfare Department, etc. chuan Zonun Enterprise, Silaimual, Melthum atangin Group of Farmers leh mimal 6 (paruk)-te hman turin Custom Hiring Centre hnuai atangin Tractor 25 leh hmanraw chi hrang hrang a vailiam.

Tractor vailiamna huna khuallian Minister Pu P.C. Vanlalruata chuan sawrkarin leilehna hmanraw tam zawk loneitute'n an neih theih nan a theih angin hma a la zel tih sawiin, kumin Annual Action Plan-ah pawh Farm Mechanization atan sum tam zawk a ruahman a ni, a ti a. Buhhum lei chungchangah harsatna a awm avangin buhhum lei tawh lova Mizoram chhunga buhfai thar lei a nih theih nan, sawrkarin policy mumal tak nei turin hmalakna chak takin a kalpui mek a ni, tih a sawi bawk.

Minister chuan oilseed tam zawk tharchhuah a nih theih nan leilet neitute pawh nasa zawka hma la a, sawrkar laipuiin ruahmanna a siamte hmang tangkai turin a fuih a. Khawl leh hmanraw dang an dawnte chu duat tak leh uluk taka enkawl a, tangkai taka hmang turin a chah bawk a ni.

Kumin hian Tractor leh leilehna hmanrua 61 (sawmruk pakhat) sem tura ruahman niin, he'ngte hi Sub-Mission on Agricultural Mechanization (SMAM) scheme hnuaia sum hmuh atanga pekchhuah tur a ni a. CHC pakhat zelah khawl leh hmanraw leina turin sawrkarin 95% (hei hi cheng nuai 14.25) vel thleng a tumsak thin a. 5% chu loneitute (Group of Farmers) tum ve tur a ni a. An tractor lak duh azirin sawrkarin tractor man atana a sum sen hi a danglam thin bawk.

Company hrang hrang 4 (pali) siamchhuah tractor-te pechhuak tur hian Sorkar chuan approved dealer 4 (pali) a nei a. Tractor leh a hmanrua dawng tura thlanchhuah farmer intelkhawm, Group of Farmers-te hian approved dealer-te atangin an tractor duh ber an thlang mai thin a ni.