No.14/2020-2021

Vawiin chawhnu khan Agriculture Minister Pu C.Lalrinsanga chuan Agriculture Commissioner leh Director te nen District hrang hranga Deputy Commissioner leh District Agriculture Officer-te Video Conference hmanga meeting neihpuiin COVID-19 Lockdown avanga thingtlang loneitute tana harsatna awmthei sutkian dan tur a sawipui.

Minister chuan COVID-19 in khawvel hmun hrang hranga harsatna nasa tak a thlen mekah India ram state hrang hrang zingah Mizoram ngei pawh a tuartu anih thu sawiin mipui harsatna leh loneitute leh kut hnathawktute harsatna tawh chu a theih anga sutkian anih theih nan Sawrkarin in hma a la mek a ni, a ti a. April Ni 14 thleng inkharkhipna kalpui mekah kuthnathawktute chu chiai lo tura a duh thu sawiin invenna uluk tak chunga ram lam hna thawh chu a tul tih a sawi.

Pu C. Lalrinsanga chuan ram lam boruak chu hmun him zawk a nihna chin a awm a. Kalkhawm dul dul zawng ni lova mangkhawh, thlai chi thlak leh thlam sak leh tul dang dang te inkhap lova hma la turin kan kuthnathawktute ka chah duh a ni a ti a. Minister chuan District leh Local Level Task Force te, Law enforcement lama thawktute, Health care provider-te leh Khawtlang hruaitute leh Kohhran hrang hrangte chu an hmalakna leh an inpeknaah fakawm a tih thu sawiin Kut hnathawk tuten tluang taka an hna an chhunzawm theih nan fimkhur tak chunga ruahmanna te siam turin District hrang hrang thuneitute chu a chah a ni.

SEDP hmanga Maize Cultivation chungchang sawiin Minister chuan SEDP hmanga District hrang hranga Monocrop vaimim chin tur, a chi an chahte chu tun COVID-19 lockdown avanga lirthei kal dan a chatlak tak avangin a theih ang anga kan vaimin chi phurtu lirtheite tanna State leh District thuneitute be pawp a, essential commodity a nih anga hma lo la tura ruahmanna siam a nih mek thu a sawi bawk.

Tunhnaiah COVID-19 denchhenin PM KISAN Scheme hnuaiah Mizoram loneitu mi 43,208-te bank account ah nimin (31.3.2020) thleng khan Cheng Nuai 864.16 thun luh a nih hman thu Minister chuan a sawi a. Kawng tinrengah Sawrkar chuan he hripui laka invenna leh a dona kawngah theihtawpin hma a la zel dawn a ni tih a sawi.

Minister chuan kan Chief Minister Pu Zoramthanga kaihhruainain mipuiin COVID-19 Lockdown chhunga thlai leh chawhmeh chi hrang hrang ei tur phang lova kan neih theih nana hma lak niin tuna veng tina ruahmanna kalpui mek a ni hi a lawmawmin a thlamuanthlak tak meuh a ni a ti a. Zoram mipuiten State dang-te entawn tlak khawpa Sawrkar thu an ngaichang thiam leh Sawrkar thupekte kan zawm that avangin lawmthu a sawi a. Chutih rualin he hripui laka beihpui thlakna kal zelah hian mipui ten tha thlah lova Sawrkar hmalaknate thlawp chhunzawm zel turin a chah a. Sawrkar thuneitute, Task Force lama duty te, Damdawi lama thawkte leh Dan leh Thupek kengkawhtute thu awih chhunzawm zel turin mitin a chah a ni.

Loneituten an lo leh thlawhhmaa an feh theih nana ruahmanna siam an kalpui dan te chu DC ten an sawi a, ramri dep Mamit leh Champhai District a khaw tlemteah erawh fimkhur thu hlaa feh khap a nih chhan te an sawifiah bawk. Kurtai hertute, sawhthing chingtute leh oil palm chingtute harsatna tawh mek DC ten an tarlang a. Kurtai hi MIZOFED in a lei dan lo ngaihtuah se tih te; Sawhthing hi MAMSOL in a lakkhawm dan ngaihtuah se tih te; Sawthing hralh tawh, a phurhchhuahna lamah harsatna tawk mekte tan plying permit pek dan zawn nise tih leh oil palm chingtute tan an tharchhuah an hralh thei nan kawng zawn nise tih te chu meeting in an rel a ni.