No.6802/2020-2021

Aizawl, the 8th December 2020: Vawiin chawhnu khan Agriculture Minister Pu C.Lalrinsanga chuan West Lungdar kuthnathawktu ten Kaihlet Zaua  thlai leh thei an chin te a hmunah kalin a endik a. Helai hmunah hian Kaihlet Zau Society te buatsaih 'Panhnah Intodelh Programme' a hmanpui a. Chhungkaw 12 te tana thlai chawmna tur tui dahkhawlna (Water Tank) 12 siam zawh tak pawh a hawng nghal bawk a ni.

Kaihlet Zaua 'Panhnah Intodelh Programme' a hmanpuinaah hian Agriculture Minister Pu C.Lalrinsanga chuan Mizo mipuite sum luan ral tamna ber chu - kan tharchhuah ve theih si, tharchhuah kan tum lem loh,  nitina kan mamawh(essential commodities) lei nan a ni a. Hei hi ngaihven leh zual a ngai a, kuthnathawktute pawhin kan state chhung mamawh zualpui phuru thei tur tal chuan tan an lak a ngai nasa hle a ti. "Kuthnathawktute vilturin Agriculture Department hnuaia mithiamte pawh Director atanga District level a officer te zawng zawng tiamin tan la zual turin kan infuih thin a.Agriculture mithiam te chu Office-ah thu mai lova Kuthnathawktute thlawhhma te a hmunah kala tlawh a, an mamawh te zirchianga, an hmasawn dan tur te ngaihtuahpui turin kan in nawr nasa lehzual  mek a ni", a ti. 

Pahnah pawh Kuhva kan ei nasat avangin kan nitin mamawh zingah engemaw ti kawng zawnga a tel ve thu a sawi a. "Sum tam tak sengin phai lam atanga lakluh a ni a, panhnah kan mamawh atanga 99% vel hi phai atanga lakluh a ni mek a. Kan ti ta sa sa a nih chuan W.Lungdar khua chu Mizoramin panhnah avanga an hriat lar ni thei turin tan an la thei a ni", a ti a. Kaihlet Zau panna kawng pawh kuthnathawktute tanlakna in a nawr nasat viau phei chuan tha zawka siam a ni ang a ti bawk a ni. 

Agriculture Minister Pu C.Lalrinsanga chuan kuthnathawktute an lo hlawk zawkna tur atan leh mipuiin khua leh veng tina dawrpuiah leh thlai zawrhna hmunah te man man zawka thlai thar lei tur an hmuh nan sawrkarin ruahmanna a siam mek a. Cooperative Society movement angin hmalakna a kal dawn avangin MIZOFED leh MAHFED te thawhpui an nih tur thu a sawi a. Kuthnathawktu intelkhawmte pawh cooperative society-ah in chhung lut zel turin kan duh a ni a ti. 

Kaihlet Zau hi W.Lungdar khua atangin KM 3 vela hlaah a awm a. Tunah dinhmunah helai hmunah hian chhungkaw 60 bawr velin huan thlai leh thei chi hrang hrang - Kuhva, Balhla, Serthlum, Panhnah leh a dangte chingin hma an la mek a. Heng kuthnathawktute hi Kaihlet Zau Society, West Lungdar hnuaiah intelkhawmin sawrkar puihna leh anmahni remhriatna ang tea hma lain an huan thlai te hi sumah an chantir thin a. Heng an thlai chin zingah hian panhnah atang hian sum an la lut hnem ber a ni.

Kaihlet  Zau Society(KZS) in a chhinchiah dan chuan he lai zauah hian KZS hnuaiah chhungkaw 35 in panhnah an ching mek a. Heng chhungkaw zinga panhnah thar tam pawl hian kum khatah Rs 3,00,000/- chuang te an la lut a. KZS hnuai chhungkaw 35 hmalaknaah hian panhnah kung 8555 enkawl mek niin kumin November thla thleng khan 136.8 qtls an tharchhuak tawh a; kumin chhunga panhnah atanga an zavaia sum lakluh hi  Rs 43,54,000/- niin chawhrualin chhungkaw tin hian  Rs 1,24,400/- an lalut tawh anga chhut a ni.