Vawiin tlai dar 3:30 khan Agriculture Minister Pu C. Lalrinsanga leh Central YMA President Pu Vanlalruata leh a thawhpui 4 chu Minister chenna Bangla Tuikhuahtlang ah tunlai Fall Army Worm in Mizoram a vaimin chingtute tana harsatna a thlen dan leh he thila Sawrkar leh Department in hma an lak dan  chungchangah inkawm hona an nei a, Minister hi Agriculture Department Director (Crop Husbandry) Pu Rohmingthanga Colney leh a thawhpui midangten an tawiawm a ni.

Agriculture Minister Pu C. Lalrinsanga chuan tunlai pangang puang Fall Armyworm (FAM) in Mizorama vaimim a eichhiat dan chungchang leh chanchin chu CYMA lam nen inhrilh tawn tha nia a hriat avangin leh he thil a CYMA theihna te hmanga a dona kawnga hma lak ho dan te sawiho tha nia a hriat avangin CYMA hruaitute chu lengah a sawm thu a sawi a. Pu C. Lalrinsanga chuan hun reilo te a he thil thlengin Mizoram District hrang hrangte a tuam dan chu a barakhaih thu leh Sawrkar leh Department anga hma lak mai a tawk lova, a ram anga kan do let a ngai a, chungte chu kan ngaihtuah ho a tul a ni tiin he thilah hian CYMA in nasa takin hma an lakpui thei nia a rin leh a beisei thu a sawi.

Agriculture Department Director (Crop Husbandry) Pu Rohmingthanga Colney leh a thawhpui mithiam te chuan Mizoram Fall Armyworm in thlai a tihchhiat chin te, India ram state dangah pawh he pangngang puang avanga loneitu te thlai a chhiat leh an lo tawrh thu te, hma an lak dante leh a dona kawng hrang hrang te chu CYMA hruaitute chipchhiar takin an hrilh a, zawhna awmte an chhang zui nghal a ni.

CMYA President Pu Vanlalruata chuan Sawrkar thahnemngaihna chu ropui a tih thu sawiin amah pawh he thil hian a barakhaih thu leh he thila YMA anga awareness siam chu thil tha leh hlawkthlak tak a nih a rin thu te a sawi a. CYMA hruaitu dangte pawhin Fall Armyworm chungchang leh a dona kawng awmte chu Agriculture mithiam te an zawt a. CYMA chuan he thilah hian a zau thei ang bera awareness kalpui dan an ngaihtuah tur thu an sawi a ni.

Tarlan tawh angin nimin khan Fall Armyworm in Aizawl chhehvel - Durtlang leh Sihphir ah te thlai a eichhiat dan te chu Agriculture Minister leh Department  hotute hian a hmun a kalin an en a, Directorate leh District ah te Rapid Response Force din tawh in a dona dan ruahmanna Strategic Plan pawh an siam tawh a. Tun thla ni 15 khian vaimin chanchin zir mithiam rual 4, Indian Institute of Maize Research atangin an lokal dawn a ni.  State thenawm Manipur ah pawh Fall Armyworm hi thleng tawhin thlai a ei chhe tan mek a ni.