May ni 8 khan Lai Autonomous District Council (LADC) huam chhunga village council (VC) 95-ahte tluang takin inthlanpui buatsaih a ni a. Hemi rual hian Chakma Autonomous District Council (CADC) huam chhunga village council 6-ah by-election buatsaih a ni bawk.

Hemi ni hian ballot paper hmangin zing dar 7-ah vote thlak ṭan niin, tlai dar 4-ah khar a ni a. Tlai dar 4-a vote thlak zawh hman lohna hmun ṭhenkhatah chuan vote thlak hun hi pawh sei a ni bawk. Vote thlak zawh fel hnu zan lamah polling station tina vote tlate hi chhiar nghal niin, chhiar zawh a nih veleh sector officer-te'n an huam chhunga mi la khawmin, Lawngtlai DC office an panpui nghal zel a ni.

LADC hnuaia VC 95-ah hian hmeichhe tana hauh bik (reserved) seat 95 awmin, general seat 374 nen a zavaiin seat 469 a awm a. Inthlan chuhtu BJP aṭangin mi 16, INC aṭangin mi 422, MNF aṭangin mi 460 leh Independent candidate mi 259 awmin, candidate zawng zawng hi mi 1157 an ni.

He VC inthlanpuiah hian MNF in seat 301 lain, khaw 62-ah hnehna an chang a; INC chuan seat 119 lain, khaw 12-ah hnehna an chang a; Independent candidate-te'n seat 45 lain, khaw 4-ah hnehna an chang a; inhneh tawkna khua 13 awmin; INC, MNF leh independent-in seat khat ṭheuh an lakna khua 4 a awm bawk.

Inthlanpui neih zawh takna he'ng village council 95-a member thlan tlinte hian May ni 14 hma ngeiin executive body an siam fel a ngai hlawm dawn a ni.

Attachment

  • Loading attachment...