Lai Autonomous District Council (LADC)-a Lungṭian MDC bial leh Chakma Autonomous District Council (CADC)-a Ugudasury South MDC biala by-election neih tura hman tur Final Electoral Roll chu May ni 9 khan tlangzarh a ni.
Final Electoral Roll-a a lan danin Lungṭian MDC bialah vote nei mipa 756 leh hmeichhia 754, an vaiin mi 1510 an awm a; Ugudasury South MDC bialah vote nei mipa 749 leh hmeichhia 797, an vaiin mi 1546 an awm.
LADC huam chhunga Lungṭian bial hi a bialtu MDC, MNF ticket-a thlan tlin Pu H. Biakzaua chuan state assembly inthlanah Lawngtlai East bial aṭanga MLA-a thlan tlin a nih hnuah a chhuahsan a; CADC hnuaia Ugudasury South-a MNF MDC Pu Pranab Kumar Chakma chu nikum July ni 19 khan a thi a; he'ng bial pahnihte hi bial ruak a nih tak avangin State Election Commission chuan by-election nei turin ruahmanna a siam ta a ni. Inthlan hun tur hriattirna erawh tihchhuah a la ni lo.
