1256/2022-2023
Aizawl, the 15th July 2022 : Agriculture Minister Pu C. Lalrinsanga chu Bangalore-a neih mek National Conference of State Agriculture and Horticulture Ministers ah nimin leh vawiin khan a tel a. July ni 14 leh ni 15 chhunga he ram pum huap Agriculture leh Horticulture Minister-te intawhkhawmna hi India rama a vawi khatna niin Union Agriculture Minister Pu Narendra Singh Tomar chuan khuallian niin a hmanpui a. He Conference ah hian Agriculture leh Horticulture-a India ramin hmasawnna bung thar chuan kai a tum dan kawng hrang hrang chhawpchhuaha sawiho a ni a. Ram pum huapa Agriculture mithiam ten presentation hrang hrang pein State Minister te pawhin mahni state dinhmun report-in harsatna te an thlen bawk.

National Conference ah hian Mizoram atanga kal Agriculture Minister Pu C. Lalrinsanga chuan thu sawiin Mizoram in Agriculture lama hmasawnna kan neih te a report a. Loneitute harsatna leh Mizoram in Agriculture lama a mamawh hrang hrang te thlenin chung zingah chuan Central Scheme pangngaiin a tuam ngai loh Agriculture Link road te, Hill Terracing te, Central Scheme hrang hranga Cost norms te chu Hmarchhak state te tan a hniam lutuk thin avanga tihsan a ngaih chungchang te pawh Agriculture Minister chuan a thlen a. Mizorama District thar pathumah KVK din belh turin Central Sawrkar chu a ngen bawk a ni. Minister chuan Mizorama Oil Palm hmalakna chungchang te pawh sawi langin loneitute tan Oil Palm scheme thar chu scheme tha tak a nih thu a sawi bawk. Kum 2021 a National Good Governance Index-a Mizoram chu Hilly States Category-a Agriculture and Allied Sector-a ti tha ber (Pakhatna) kan nih angin Mizoramah hian Agriculture lama potential kan ngahzia leh Central Sawrkar tan pawha duhsak bik kan tulzia Minister chuan a sawi a. Central sawrkar hotute pawhin a thu thlente chu an lo enzui nghal tur thu in an chhang a ni.

Minister Pu C. Lalrinsanga hian Bangalore a cham chhungin Bangalore Mizo Association te pawh thil pawimawh tak tak a sawipui a. A tul apianga an lo hman atan Rs. 30,000.00 a pe bawk.

National Conference of Agriculture and Horticulture Ministers ah hian Mizoram Agriculture Minister Pu C. Lalrinsanga hi Pu J. Rothanga, Jt Director leh Dr. Samuel Lalliansanga, Dy Director, Department of Agriculture ten an tawiawm a ni.