No.3146/2021-2022
Dated Aizawl the 25th November, 2021: Vawiin khan Serchhip Zawlpui zauvah khawl hmanga buh seng runpui (Improving Agriculture by Farm Mechanization), 2021 buatsaih a ni a. Pu. C. Lalrinsanga, Minister, Agriculture, etc., chuan he hun hi khuallian niin a hmanpui a. Pu. Lalduhoma, bialtu MLA chu khualzahawm a ni.

Chawhma lamah Mat phai Zawlpui zauva buhte chu khawl hmanga seng a nih hnuah chawhnu lamah leilet zawlah buh seng lawmna hun buatsaih zui a ni a. He huna khuallian Pu C. Lalrinsanga chuan, zawlpui zauva bul lo zu tantute thawhrimna leh tumruhna fakin, an zarah vawiinah chuan buh tharna hmun zau tak kan lo nei ta a ni a ti a, vawiina loneituten hlawk taka an lote an enkawl theih nan nasa zawka khawl hman (farm mechanisation) hi sawrkarin a ngai pawimawh hle a, Sub Mission on Agriculture Mechanisation(SMAM) hmalakna pawh a lian chho zel a, Custom Hiring Centre hmanga Tractor kan semte pawh a dawngtuten tangkai taka an hman kan beisei tlat a, kan chik zui reng a ni, a ti a. Heng khawl tha tak tak sawrkarin loneitute hnena a pek thin chhan chu tam zawk leh hlawk zawka tharchhuah kan neih zel nan a ni tih i hre reng ang u, a ti. Fur tui lianin leilet a tihchhiat thinte pawh zirchiana, a invenna lam pawh kan ngaihtuah chho zel turah ngai ila, chutiang bawkin a chhung inkalpawhna pawh kan umzui zel dawn a, Chawmkai leh Thinglubul zau inkar kawng pawh FOCUS hmalaknain kawng (rigid pavement) siam tum mek a ni a, hmun dangte pawh lung phah tura ruahmanna siam mek a ni thu a sawi a, leilet bial chhung siam rem hnate leh Zawlpui leh a chhehvel zau hrang hranga Electric eng pek darh zau hnate pawh bialtu MLA te nena inbe zel chungin kan thawk zel dawn a ni, a ti bawk. Ni zung chakna hmanga tui pump khawl unit 200 zet tunah hian pek chhuah tan mek a ni a, hei hi thlai chinna hmun tha tuilakna nei tha silote tan leh kumtluana thlai kan thar theih nana ruahman a nih thu a sawi a, Unit sang tel neih belh tumin tunah hian hmalakna neih leh mek a ni a, Zawlpui leh a chhehvel zaute tan lo lu lama tui dahkhawlna (Over head Tank) 11 FOCUS atanga siam tum a nih thu a sawi bawk. Hmun remchangah tui dahna kan siam ang a, Mat tui kan pump chho anga, thlai chawm nan gravity -a sem darh leh tur a ni a, Mat phai hmun 32 ah tui verh chhuah tumin hma kan la mek bawk a, helai vela loneitu mi taimate hi an vannei tial tial dawn a ni, a ti. Sawrkar ruahmanna hrang hrangte tha taka thawhpui zel tura sawmin, loneituten kan ram mamawh zat tal kan tharchhuah theih nan a huhova thlai chin (collective farming) ruahmanna te pawh kan siam chho mek a, a taka kan kalpui thuai pawh beisei a ni, a ti a ni.

Khualzahawm Pu Lalduhoma, bialtu MLA pawhin thusawiin, Zawlpui leh a chhehvel zau hrang hranga loneitute tana sawrkar hmalaknaah lawmthu sawiin, an mamawh hrang hrangte leh hmachhawp la awmte a tarlang a. Bialtu MLA anih anga hma a lakpui tawhna te pawh a tarlang bawk a ni.

Serchhip bawrhsap Pu Kumar Abhishek, IAS pawhin thusawina neiin, Zawlpui leh a chhehvela khawl hmanga buh seng runpui neih a ni chu lawmawm a tih thu a sawi a. Loneituten hmasawnna hmel duhawm tak tak an hmu chho zel chu lawmawm a tih thusawiin, tlangram loneih bansana lo nghet nei zawnga kan insiamrem zel a tul thu a sawi a. Khawl hrang hrangte chu loneitute tharchhuah leh sum lakluh tipungtu, an theihna tipungtu a nih bakah kumtin lo vah bansan zawnga min hruaitu atan pawh a tul hle tih a sawi a ni.

Buh seng lawmna inkhawm hi Pu James Lalsiamliana, Addl. Director, Agriculture Department in a kaihruai a. Hunserh Upa Vanlalzapa'n hmangin Pu Thanhnuna, Asst. Zawlpui FMC chuan report a pe a ni. Mat phai zau hrang hranga buh chinna hmun zau zawng hi 270 Ha. vel a ni mek a, buh hi a tlangpuiin phur 10000 vel thar anga chhut a ni.

Agriculture Minister hi Pu TC Pachhunga, Ex-MLA, Vice Chairman, Sports, Youth Affairs & Tourism Development Board te, Pu Rochhunga, Ex- MLA, Vice Chairman, Land Revenue & Survey Board leh official pawimawhten an tawiawm a ni.

Buh seng lawmna inkhawm hi Pu Tlangtimawia Zote, DAO, Serchhip chuan lawmthu sawiin a khar a ni.