No.3145/2021-2022
Dated Aizawl, the 25th November, 2021: Vawiin khan Pu R. Lalzirliana, Honourable Minister, Art & Culture, etc chuan Serchhip kiang Kawlri tlangchhipa Art & Culture Heritage Conservation Grant in Aid- sum Rs. 8.22 lakh hmanga Serchhip Heritage Society ten an sak Chawngpuii Khawthlir a hawng a. Pipute thil hlui leh an hmunhmate vawnghima humhalh thar turin tlai luat a awm lova, tun hi hun tha a ni reng zawk a ni tih i hre reng ang u, a ti.

A hawnna inkhawm, Kawlri tlanga Pastor Chhawna Tawngtaina In tuala buatsaihah Pu R. Lalzirliana chuan, Mizoten lal ropui tak tak tam tak kan nei tawh a, nimahsela chung lal ropui tak takte chuan hriatreng leh chawimawi an hlawh vek lem lo. Serchhip erawh chuan tun hmaa in hmunhmate lo awp tawhtute hriatrenga chawimawina chang in hria te, an hmunhma vawnhim duhna thinlung in neite, Heritage Society hialte in din hi a entawn tlak hle a ni, a ti a. Serchhip Heritage Society hruaitute Serchhip leh a chhehvela pipute thil leh hmun hluite vawnhim thuah hma an la tlai deuh tawh nia an inhria chu a la tlai loh thu hrilhin; Pipu hmun hluite vawnthata humhalh leh nan tlai luat a awm lova, tun hi hun tha a ni reng zawk a ni. Tin, history te hi tun hnua han hriatfiah zawk takte pawh a awm thei zel a, thil chiang zawk hre tura beih zel kha kan tihtur pawimawh a ni a, an nungchang duhawm tak takte pawh kha i zir nawn leh ang u, a ti. Minister hian, hnam inpumkhatna leh in unaunate pawh kan tobul hriatnain nasa takin a tanpui thei a, zo hnahthlak tawng chi hrang hrang, inzul tak tak si engemawzat awmte hian hnam ropui leh darhzau tak kan nihzia a tifiah hlein ka hria. Thil hlui awmze nei tak takte leh kan tobul hriatna tipung thei te hi kan tan a hlu em em veka, vawiina kan hawn tak pawh hi chung thil hlute zinga mi chu a ni, a ti bawk. Pu. R. Lalzirliana hian Serchhip Heritage Society te hi tanpuina pawisa a pe a ni.

He huna khualzahawm Pu C. Lalramzauva, Adviser to CM pawhin thusawiin, Serchhip chu Pastor Chhawna khua a ni a, vawiinah pawh a chenna in lo ni tawh thin kianga hun hmang kan ni a, Mizoram huapa Pastor lar leh Zoram hma lam hun inlarna ropui tak neitu, vawiin thlenga kan tui pui em em a ni a, a sir maiah Bengkhuaia in hmunte a awm a, tin Chawngpuii Khawthlirte a awm bawk a, vawiina kan hun hman hi a hlu hle a ni a ti a. Chawngpuii Khawthlir sak a nih theih nana hma min lak saktu kan Minister Pu R. Lalzirliana chungah a lawm thu a sawi, ani zarah heng kan hmun hluite hi a lo hlu lehzuala, a phuisui phah hle a ni, a ti a. Serchhip Heritage Society te hmalakna fakin theihtawp chhuaha bei zel turin a chah bawk a ni.

Pu K. Lalruala, Deputy Director, Art & Culture pawhin thusawina hun a hmang a, Serchhipin pi leh pute hmun hlui vawng thatu pawl chak leh bengvar tak an nei chu lawmawm a tih thu a sawi a ni.

Chawngpuii Khawthlir hawnna inkhawm hi Pu Lalrinthuama Kawlni, Chairman, Serchhip Heritage Society in a kaihruaia, Upa R. Laldaihzauva'n hunserh hmangin, Pu Kaptluanga Ralte, Asst. Secretary in report a pe a. 25th May, 2020 khan hna thawh tan a ni. Pu K. Remruatfela, Secretary chuan Serchhip History tlangpui sawina a nei bawk. Serchhip lal hmasa bera ngaih chu Lalrumi niin kum 1856 ah Serchhipah a lal tawh nia hriat a ni a. A thlahte pawh vawiin thlengin Serchhipah an la awm a ni. Lalrumi pasal hi Sailianpuia, lal ropui Suakpuilala fapa a ni a, Sailianpuia farnu hi Chawngpuii niin nula hmeltha tak a ni. Nimahsela pasal a neih hnu rei vak lovah raichehin Chawngpuii hi a thi hlauh mai a. Chawngpuii ngaia lungleng taka an len thinna tlang chhip hi Chawngpuii Lunglen tlang tia phuah zui a ni ta a. He hmunah hian vawiina Minister in a hawn tak Khawthlir (View Tower) hi sak a ni.

Chawngpuii Khawthlir hawnnaah hian Pu. Stephen Lalrinawma, SP, Serchhip, Heritage Society hruaitute leh member te, official sawm bik thenkhatte an tel a ni.