No.1034/2021-2022

Aizawl, the 18^th June 2021 : Vawiin khan Agriculture Minister, Pu C Lalrinsanga, Irrigation & Water Resources enkawltu ni bawk hovin Agriculture leh Irrigation & Water Resources hotulu ten Department pahnihin loneitute hamthatna tur atana hmalakna an neih mek leh loneitute harsatna kaihhnawih thil hrang hrang sawiin review meeting a Pisa-ah an nei.

Pu C. Lalrinsanga chuan COVID-19 hrileng avangin duh angin hmalakna kalpui theih loh ni mahse Department chuan a thei ang angin loneituten hamthatna an dawn theih tur ang leh an tana hmalakna te chu kalpui tho a ni tih a sawi a. Mizorama loneitute tana central scheme kumina kalpui tur Pradhan Mantri Kisan Urja Surasha evam Utthaan Mahaabhiyan (PM-KUSUM) chungchang sawiin he scheme hi nikum lamah kalpui kan tum a, mahse a funding pattern 50:30:20 (50 – central, 30-state leh 20-beneficiaries-te) chu Mizoram Sawrkar dihmun ngaihtuahin kalpui a harsa a. Mahse he Scheme hi loneitu, a bik takin WRC buaipui tute tana thil tha tak, an mamawh phuhrukna bakah he Scheme hian Mizoram tharchhuah a tihpun thei avangin funding pattern pawm turin hma lakna a tharin kan nei leh a. He Scheme hnuaia State Sawrkar sum thawh tur za zelah 30 chu Chief Minister in min remtihsak a, hei hian Sawrkarin loneitute a ngaihsakzia a tilang a ni, a ti. PM-KUSUM-ah hian Department pahnih te chu inrawn chunga hma la tura hrilhlin a theih ang angin convergence anga kalpui turin Department hotute a chah a ni.

Meeting-ah hian PM-KUSUM hnuaia hma lak dan tur leh kalpui tan tur chu chipchhiar takin sawi a ni a. A thawh khatna-ah hian loneitu 200 tan nizung chakna hmanga tui pumpna khawl chu he Scheme hnuaia kalpui tum a nih thu leh a thawhhnihnaa loneitu 2000 tan kalpui tum a nih thu meeting-ah hian sawilan a ni. Tunhnaia ruahtui a tlak har avanga Mizoram District hrang hranga loneitute harsatna tawh report Agriculture Department in an dawn chu sawilan niin Champhai lamah buh chi kui tiah lamah harsatna an tawh mek thu leh District thenkhata report an dawn dan te tarlan a ni. April thlaa Mizoram hmun hrang hranga kangmei chhuakin thlai a tihchhiat dan report pawh meeting-ah ngaihthlak niin Agriculture Department hnenah report a luh dan chuan a vaiin thlai/thei chi hrang hrang cheng vaibelchhe 11.36 hu man a chhiat thu leh Lawngtlai District chu a tuar nasat ber thu meeting-ah hian tarlan a ni.

Tunhnaia Mizoram District hrang hranga Fall Army Worm (FAW) in vaimim a tihchhiat dan Agriculture Department in a buaipui chungchang pawh meeting-ah hian tarlan a ni a. Mizorama vaimin chinna zawng zawng hectare 3441 atangin hectare 1318 chu  FAW in a khawih a, thlai a tih chhiat dan Infestation chu za zelah 37 vel niin loneitu chhungkaw 6834 hi FAW in a tibuai a ni. Rural Infrastructure Development Fund (RIDF) hmanga Mizoram District hrang hranga zau siam thar mek chu hrilengin a hna a tihkhaihlaka, mahse ram hectare 480 siam thar turah hectare 200 bawr chu peihfel a ni tawh thu meeting ah hian sawilan a  ni a. Heng zau tharah te hian kumin atangin buh leh thlai chin beisei a nih thu Agriculture Department chuan an sawi.

Meeting ah hian kangmei in, thlai a tihchhiat sak, loneitute te hnenah zangnadawmna pek theih dan chungchang pawh sawi niin DC kaltlanga Sawrkarin in SDRF-in ruahmanna a neih anga kalpui thei a ni a, mahse zangnadawmna an dawn theih zat chu a tam thei vak lo niin sawilan a ni.

Meeting ah hian Agriculture leh Irrigation & Water Resources Secretary Pu J. Hmingthanmawia, IAS; Agriculture Department Director Pu Rohmingthanga Colney leh Irrigation & Water Resources Department, Chief Engineer Pu Lalrotluanga te bakah an thawhpui senior officer dangte an tel a ni.