No.1033/2021-2022
Aizawl 18th June 2021: School Education Minister Pu Lalchhandama Ralte chuan hripui lengin ram pum min tihbuaina kara HSSLC Examination result tihchhuah theih a ni chu ram tan thil chhinchhiahtlak tak a ni a,  a lawmawm hle a ni a ti.

Minister Pu Lalchhandama Ralte chuan, India ram hmun dangah Board hrang hrangin  hripui leng avanga Exam an buatsaih thei loh laia Mizoramin HSSLC result a tichhuak thei ta mai chu MBSE-a thawktu zawng zawngte leh zirtirtute thawhrimna a nih mai bakah State Executive Committee te, mipuite  leh VLTF/LLTF te tawiawmna leh thawhpuina rah a ni tiin an chungah thinlung takin lawmthu a sawi a ni. Minister chuan HSSLC Result chhuaka hlawhtlinna changtu zawng zawngte, nu leh pa leh an zirtirtute a lawmpui thu a sawi a.  Zirlai hlawhtling ve ta rih lote pawh rilru tihnual mai lova, taimakna leh tumruhna thar nen beidawng lova hmalam pan turin a fuih nghal bawk a ni. Minister chuan tute pawhin an nih tum nih theihna an nei vek a, amaherawhchu, an nih tum hlenchhuakte chu rilru pau khauh leh hnungtawlh duh ngai lote an ni thin tih sawiin zirlai pass tharte leh la hlawhtling rih lote pawh rilru paukhauhna nen ram leh hnam chhawr tlak ni ngei tura inzir sauh sauh turin a chah a ni.

HSSLC Result 2021 vawiina tihchhuah takah hian centre 86-ah school 186 an awm a,  candidate 11849 an awm a, heng zinga 11491 ten exam an hmachhawn a ni. Exam hmachhawn zinga 8622 chu Arts an ni a, Science 2299 leh Commerce 570 an ni. Distinction-ah 1078 an pass a, First Div-ah 4560, Second Div-ah 3605, third Div ah 846 an pass a. A pumpuia pass percentage chu 87.80 a ni a, nikum aiin 9.28 in an tam a ni.  Nikum result nena khaikhinin Distinction a pass hi  647 in an tam a, First Division a pass hi  1754 in an tam zawk a, Second division a pass hi 444 in an tam zawk bawk a, third Division-a pass hi nikum aiin 1545 in an tlem zawk thung.

A pumpuiah zirlai exam hmachhawn-ah mipa aiin hmeichhia 507 in an tam zawk a, pass zatah pawh hmeichhia 567 in an tam zawk bawk. Hlawm hrang hranga an pass percentage chu Arts-ah 94.48% Science-ah 94.35%, Commerce-ah 94.16% in an pass a ni  Subject malah mark 100 a 100 hmu thei Mathematics-ah chauh an awm. Candidate zawng zawng pass thei vek Arts-ah school 69, Science-ah school 6, Commerce-ah school 10 an awm a, candidate zawng zawng fail vekna school 1 a awm thung a ni. Fail school hi insawifiahna pe turin Minister-in School Education Director chu a hriattir nghal a ni.