No.1032/2021-2022

Aizawl the 18th June, 2021 : Vawiin chawhma dar 11 khan Prime Minister Narendra Modi chuan Video conferencing hmangin Covid 19 dona atan – ‘Customised Crash Course Programme for Covid19 Frontline workers’ PMKVY 3.0 (CSCM) scheme hnuaia programme chu rampuma kalpui turin a hawng. State 26 atangin Training centre 111 ah kalpui a ni dawn a. Mizoramah chuan Mission Foundation Movement, Bawngkawn chu National Skill Development Corporation leh Healthcare Sector skill council hnuaia Affiliation nei an nih angin he course kalpui tur hian sawrkar laipui chuan a thlang a ni.

Labour, Employment, Skill Development & Entrepreneurship Department leh Aizawl DC kaihhruai District Skill Committee kaltlangin zirturte hi lak an ni a, a thawhkhatna atan mi 160 training pek tumin ruahmanna siam a ni. Batch khatah 20 zel awmin training hi kalpui tur a ni a. Ni 21 chhung training tur niin, Training zawhah Health Department hnuaia Hospital hrang hrang ah thla 3 chhung (On job training) duty leh tura ruahman a ni.

Central sawrkar chuan Job role 6 rawn duangchhuakin, heng zinga mi Covid - Basic care support (GDA) chu kalpui tura thlan a ni a. Training fee awm loin, stipend hi PFMS kaltlangin central sawrkar in zirlaite accountah a thun ang a, accidental insurance Nuai 2 thleng he scheme hian a keng tel dawn bawk a ni.

Frontline worker mamawhna a san em avangin mi nuai 1 train chhuak turin Ministry of Skill Development & Entrepreneurship leh Ministry of Health and Family welfare chuan ruahmanna siamin State tina Accredited Training centre performance tha 111 ah a thawhkhatna atan kalpui tan turin ruahmanna a siam a, hemi atan hian Central sawrkar chuan 275 crore Budget a dah a ni.

He programme hi non-medical healthcare worker indaihlohna chhawk zangkhai tur leh hmalam hun atana lo inbuatsaihna tur scheme a ni.

Mission Foundation Movement (MFM), Bawngkawnah he programme hi Video conferencing hmanga lo chhim ve in, 1st batch zirlai 10 thlanchhuah bakah Aizawl DC, Health department leh LESDE Dept aiawh ten an hmanpui.