No.1031/2021-2022

Dated Champhai, the 18th June, 2021: Vawiin khan Champhai District Level Wildlife Crime Control Sub-Unit chu Chairman Pu Lalrinpuia Varte, SP Champhai hovin SP Office Chamber-ah hmalak tawh dan leh tul dangte relin an thukhawm.

Pu Lalrinpuia Varte chuan Wildlife crime huam chin a zauh avangin hemi hnuaia dan hrang hrang awmte zirchianga, intuaithar chung zela mipuite zirtirtu nih tum turin member-te a chah a. Lungrual taka thawkhoa infinchhuah tlanpuiah sawmin, mahni theihna zawn theuhah thahnemngai taka ngaihtuahna seng theuh turin a chah a ni.

Pu Lalduhthlana, DFO Champhai & Member Secretary, District Level Wildlife Crime Control Sub-Unit chuan meeting hmasa thurel tlangpui leh bawhzui a nih dante a tarlang a. Nungchate chunga pawikhawihna thleng thinte rang taka dapchhuaka hremna lekkawh a nih theihna turin July ni 15, 2015 ah State Level Wildlife Crime Control Unit leh District Level Wildlife Crime Control Sub-Unit te din a nih thu a sawi a. A tira member ruatte bakah November ni 20, 2020 a Champhai District Level Wildlife Crime Control Sub-Unit thukhawmin member thar DFDO, District VC Association, Sub-Hqrs. YMA, MJA leh Champhai Nature Conservancy (CNC) te a ruat belh thu tarlangin, Champhai District puala Honorary Wildlife Warden tura rawtna siam chu pawmpui tura ngaihchan mek a nih thu a sawi bawk.

Thutkhawmah hian tunhnaia social media kaltlanga tarlan, Ui rual nena sapela Sakhi beihna video vawrhdarh chungchang pawh ngaihtuahho niin, video te enho a ni a. A titu leh khawi hmuna thleng nge tih hriat ni chiah lo mahse, Champhai District chhunga thil thleng a nih mial takin tih thuah theihtawp chhuaha zawnchhuah hna kalpui nise tih a ni a. Committee hmingin Sub-Hqrs. YMA Champhai hnenah thawhpui tura ngenna siam nise, a chingchang hriaa zawnchhuah kawnga pui theite hnenah lawmman siam nise, Social media kaltlangin thil thlen dan video hmanga mipuite hnena ngenna leh tul dangte siam nise tih a nih bakah, Police leh Forest Department tangkawp Joint Patrolling Team-in a tul angin hma la se tih a ni a. Ramngaw leh nungcha humhalhna dan siam bawhchhiate hrem an nih ngei theihna tura kawhhmuhtu hnena lawmman pawisafai pek theihna, 'The Mizoram Rewards for Detection of Forest and Wildlife Offence Scheme, 2019' chungchangte pawh he hunah hian zirho a ni bawk.

Heng bakah hian silai kawl chungchangte pawh sawiho niin, license neih ngai chi silaiten license an neih vek theih nan leh, license nei pawhin pek an nih chhan ang taka hman a nih theihna tur leh, nungcha humhalhna dante bawhchhiat a nih lohna tura hmalak a nih theihna turin Committee hmingin DC hnenah ngenna siam nise tih a ni a. Dan lova ramri kaltlanga nungcha Exotic species tawlh thinte ven kawngah tanlak zui zel nise tih a ni bawk.

November ni 20, 2020 a Champhai District Level Wildlife Crime Control Sub-Unit thurel bawhzuiin, Champhai Forest Range Staff leh Champhai Police tangkawp chuan Joint Patrolling an nei thin a. November ni 28, 2020 khan Ngur khaw ramah leh Bawktlang pengahte thingzaina chainsaw 3, silai 5 leh a mu, sairawkherh leh sava thangte an man a. November ni 30, 2020 khan Ruantlang daiah Sakhi 1, Vahrit 1, Airgun 2, Ulhbun 5 leh silaimu man a ni bawk. Ramsa leh sava thangte hi December ni 4, 2020 khan hal ral niin, silai mante hi hun engemawchen hren sak an nih hnuah ramvak tawhlo tura intiamkamna neih tira pek chhuah a ni.