No.7516/2020-2021

Vawiin khan Agriculture Cooperation, Irrigation & Water Resources Minister Pu C. Lalrinsanga chuan SBI Foundation  leh Goodwill Foundation te țangkawpin an buatsaih SBI Gram Seva Kendra hawnna inkhawm Bawngva khua, Mamit District a neihah Khuallian niin a hmanpui a, Vice Chairman, Road & Infrastructure Development Board leh Bialtu MLA ni bawk Er.H.Lalzirliana chu Khualzahawm a ni.

He hun hmanpuitu Khuallian Pu C.Lalrinsanga Minister chuan thu sawiin, SBI Foundation leh Goodwill Foundation te țhahnem ngaihna a Gram Seva Kendra, Bawngva khua-a hawn theiha alo awm ta hi a chhawr țangkai tur mipui te a lawmpui thu a sawi a. Goodwill Foundation hian Zoram tan hna țha tak alo thawk tawh a, Foreign aid thleng a pawt lut thei a ni, a ti a. Gram Seva Project hnuaiah hian zirna kawnga hmasawnnate, hriselna leh hmeichhe chawikan na lam leh development activity lokal tur a tam hle a, hengte hi hman tangkai thiam a, tangkai tak a hmang turin a chah a.  Minister chuan theihtawp chhuaha thawhrimna nen kut humruh chunga lo hmachhawn turin a chah bakah mawhphurhna kengtu a bikin Self Help Group leader te theihtawp chhuah leh zual turin a chah bawk a ni.

Minister chuan Van Dhan Mission chungchang sawiin, Mizoramah Van Dhan Mission kaĺpui chhoh țum a ni a, he mission hnuaiah hian Van Dhan Visas Kendra (VDVK) awmin, VDVK pakhat hnuaiah hian society sawm pakhat zel din chhoh tur a ruahman a ni a ti a. Van Dhan Mission in a tum ber chu Tribal-te'n an chhehvela ramngaw ti chereu silo a, a hausakna hmang tangkaia intunnunna atana an hman theihna tura ruahmanna siam niin awmze nei zawk leh an chhehvel ramhnuaia thil thar chhuahte an mahni ngeiin an sawngbawla, a hralhna thlenga an kutken theihna tur scheme a ni, a ti bawk.

Khualzahawm Er H.Lalzirliana pawhin thu sawiin, SBI Gram Seva project kalpuina tur atana India ram khaw tam tak atanga khaw 75 thlan chhuah zinga Bawngva khua a tel chu a ropui hle a, Bawngva mai bakah kan District chhungah khua pali dang pilot project atana thun luh an ni leh zel te hi hlutna chang hria a, theihtawp chhuahin an hmalakna te tawiawm thiam a, he project hmanga heng khua thlanchhuahte hian hmasawnna kawng an zawh naah theihtawpa tawiawm a tum thu a sawi.

Gram Seva Project hi Mamit District-a khaw thlanbik Khaw panga- N.Sabual, Darlak, Phaizau, Bawngva  leh Suarhliap-ah te kalpui me a ni. Thingtlang khuate tih hmasawnna tura hmalakna niin, zirna, hriselna, hmeichhia leh țhalaite chawikanna, hriselna lam, Skill development, environment, ei leh bara intodelhna tura hmalakna te a ni.

Gram Seva Kendra hi SBI Gram Seva Project hnuaia peng pakhat niin thingtlang khaw mipui ten he Centre atang hian Sorkar scheme chi hrang hrang te leh development thil tam tak an hmuha an hriat zung zung theihna tura buatsaih a ni. Centre hi TV, Computer, printer, internet connection leh projector te bakah tunlai changkanna thil tam tak nena thuam a ni a. Khawtlang mipui ten englai pawha an hriat duh te an hriat zung zung theihna tura buatsaih a ni. He Project enkawl tur hian Goodwill Foundation chu thlan niin anni hian project hna zawng zawng hi an thawk dawn a kum thum chhung he project hi an enkawl dawn a ni.