No.1435/2020-2021
Lawngtlai, Tomir thla ni 28, 2020: Agriculture Minister Pu C. Lalrinsanga chuan vawiin khan Chawngte tlawhin, Chakma Autonomous District Council (CADC) member-te nen inkawm hona hun an hman bakah, COVID-19 laka mipui an him nana thawktu border area-a VLTF te a tlawh bawk.
CADC Rest House-ah CADC Chief Executive Member (CEM) Pu Rasik Mohan Chakma leh a thawhpui member-te nen inkawm hovin, COVID-19 kara CADC area-in a mamawh thil hrang hrang an sawi ho va. Minister chuan lockdown vanga harsatna hrang hrang awm thei sawrkarin a ngaihven reng tih sawiin, chuti ang harsatnate chu a hmuna zir chiang tura thawk chhuak an nih thu a sawi a. COVID-19 boruakah thil dang zawng aiin ei leh bar tur kan mamawh ber avangin harsatna lo thleng thei laka lo inralrin a, intodelh tura hma lak a pawimawh a ni, a ti.
Minister chuan India ram pumah March ni 22-a Janta Curfew puan hnuah March ni 24 atangin lockdown kalpui tan a nih thu sawiin, Mizoram Agriculture Department erawh chuan kut hna thawktute hmakhua ngaiin March ni 3 atangin Agriculture Helpline an lo siam diam tawh tih a sawi a. COVID-19 boruaka agriculture a pawimawhzia hriaa Chief Minister-in a duhsak thinnaah department pawh an lawm hle, tih a sawi.
Minister chuan Chawngte area chu intodelhpui thama buh leh thlai thar chhuak thei turin hmun tha leh awhawm tak a ni tih sawiin, tunlai thiamna leh khawl changkang hmanga hma lak thaa a hriat thu a sawi a. District Council hruaitute chu chumi atana hma la tura chahin, a tul apiangah tanpui tura an inhawn reng thu a sawi.
Minister hian CEM kutah hnim kahna hlo leh khawl (2,4-D weedicide leh knapsack sprayer) eng emaw zat bakah, thlai chi eng emaw zat a hlan a. COVID-19 laka mipui an him nana thawktu border area-a VLTF duty-te tlawh bawkin, an dinhmun leh harsatnate a zawt fiah a. Mizoram him nan ramri chu uluk taka ven a pawimawh thu sawiin, tha thlah lova tan la turin a fuih a. An mamawh tur hrang hrang - medical & disaster response supply te, silpauline leh pawisa fai te a hlan a. Hemi rual hian MNF General Headquarters chuan VLTF-te tan silpauline leh pawisa fai an hlan ve bawk.
Minister hi Lunglei DAO Pu Tlangtimawia Zote, Agriculture Development Board Member Pu Lalruatfela Colney leh MNF party hruaitute'n an tawiawm a. Chawngte atanga a haw kawngah Lawngtlai DAO office pawh tlawhin, COVID-19 hri leng kara Lawngtlai District chhunga agriculture lama hma lak dan turte a sawipui bawk.
