1916/2022-2023
Aizawl the 14th September, 2022: Vawiin khan New Delhi-a neih, Outlook Agri Tech Summit and Swaraj Awards ah Mizoram sawrkar aiawhin Agriculture Minister Pu C. Lalrinsanga chuan Best performing State in Agriculture among the North East States lawmman a la a. Union Agriculture Minister Pu Narendra Singh Tomar chuan lawmman hi a hlan a ni.

Outlook Tech Summit and Swaraj Awards hi New Delhi-a A.P Shinde Symposium Hall, ICAR (India Council of Agriculture Research) compound-a neih niin Summit ah hian Agriculture leh a kaihhhnawih a India ram hmun hrang hrang atanga mithiam ten subject hrang hrangah presentation an nei a. Outlook Tech Summit ah hian Swaraj Award hi sem niin category hrang hrang - Outstanding KVK, Outstanding FPO, Outstanding Scientist, Outstanding Institutions, Outstanding Farmer Cooperatives, Outstanding State, Outstanding North East State, Outstanding Union Territory leh Outstanding Innovative Farmer ah te Award hi sem a ni a. Mizoram chuan Outstanding North East State in the field of Agriculture a dawng a ni.

Summit ah hian Lawmman latu Agriculture Minister Pu C. Lalrinsanga chuan thu sawiin Mizoram chu foreign ram dang pahnih karcheha awm a nih angin India ram tan cultural Ambassador hna pawimawh tak a thawk reng a. India ramin Mizorama hmasawnna a ngaih pawimawh dan chu khawchhak ram hrang hrang te laka India hmel lanna hlimthla pawimawh tak a ni a ti. Minister chuan Mizoramin Agriculture ah, a bikin Organic leh Natural farming-ah theihna tam tak a neih chu India ram tana thil hlu tak a nih avangin Agriculture leh a kaihhnawih a North East tan bika scheme siam belh turin Sawrkar laipuiin tan lak a ngaih thu a sawi a. India ramin Be (Pulses) tharchhuah kawnga indaihlohna nasa tak a hmachhawn mekah Mizoram leh North East state te chuan organic leh natural farming mode hmanga thar turin theihna bik kan nei a ni a ti a. Outlook Tech Summit and Swaraj Award-a Mizoramin Best performing North East State in the field of Agriculture lawmman a lak chu Agriculture lama thawktute, a bikin kan loneitute leh sawrkar thawhhona tha tak rahchhuah a ni a, he award Mizoramin a dawng hian Mizoram Loneitute leh Mizoram Sawrkar in theihtawp chhuah a tlawm taka hma kan lak ve na te chu India ram hian min hriatpui a ni tih a tichiang a. He lawmman hi Mizoram loneitute tan ka hlan a ni a ti.

Mizoram hian Kum 2021 khan ram pum Good Governance Index ah Agriculture and Allied Sector in Hill States Category ah Lawmman pakhatna kan lo la tawh bawk a ni.

Award a laknaah hian Agriculture Minister hi Pu James Vanlalluaia, Additional Director, Agriculture Department leh Officer dang ten an tawiawm a. Minister hian New Delhi a cham chhungin Sawrkar Laipuia mi pawimawh te hmu in Mizoram mamawh te thlen in hun a hmang chhunzawm ang.