1743/2022-2023

Lunglei the 29th, August' 2022: Vawiin khan Agriculture changtu Minister Pu C. Lalrinsanga'n Convention Centre Lunglei ah Sorkar Flagship Programme Socio Economic Development Programme chu Lunglei District te tan a hawng.

SEDP hawnna hun hi Lunglei Bawrhsap Pu Kulothungan A, IAS chuan kaihruaiin khuallian Pu C. Lalrinsanga chuan Covid hripui in min tihbuai hnuah SEDP kalpuia beneficiaries te hnena sum pek chhuah tur ruahman a ni ta chu lawmawm a tih thusawiin SEDP hi mirethei leh chhumchhia te khaichhuahna Programme a ni a ti a. Harsatna hrang hrang karah Chief Minister Pu Zoramthanga inpekna leh merethei te dinhmun tha zawka hlankai tumna chu a fakawm a tih thu a sawi bawk. Tuna Family Oriented SEDP sum pekchhuah tur chu first Installment a nih thu tarlangin Installment dang chu pek leh thuai a nih tur thu a sawi a, nuai 3 a tlin hma chu sawrkar in pek zel a tum tiin a sawi. SEDP beneficiaries te chu an sum hmuh ang ang te dinchhuahpui ngei tuma hma la turin a fuih a ni. Line Department hrang hrang te pawn SEDP Family Oriented beneficiaries te an hlawhtlin ngei theih nan theihtawp chhuapuia tan lakpui turin a chah bawk a ni. Buh leh Bal bakah thlai a kan intohdelh theih nan tanlak a ngaih thu sawiin State pawn atanga lakluh vek ngai lovin mahni a intodelh tum theuh turin a chah a ni. Vaimim hi kan ran vulh Vawk, Bawng leh Sangha te hian an duh em em a, ran chaw herna khawl pawh ngaihtuah a nih tur thu a sawi a, ran vulh taima khuaah vaimim herna khawl dah a tum thu a sawi bawk.

Pu Lawmawma Tochhawng, MLA leh Vice Chairman HPC pawh in thu sawiin Covid hripui avangin SEDP hi bul tan theih lawk a ni lova tuna ataka sem a ni ta hi lawmawm a ti a. SEDP hi mihring puitling ni tura chherchhuahna Programme niin intodelh a khawsak a lo nawm theih na thinlung put a, pek chhan hre reng a chhungkua tana tangkai pui turin beneficiaries te a chah a ni.

Dr. K. Pachhunga MLA leh Vice Chairman, Bamboo Development Board chuan SEDP a taka sem a lo ni ta hi lawmawm a ti a. India sorkar min puihna hi a zuih tial tial a, chuvangin Central sorkar puina tel lova kan awm a ngai a, kan thawhchhuah ve a ngai a, huan nghet tharchhuak tam thei siam a intohdelh a ngaih thu a sawi a ni.

Dr. Vanlaltanpuia, MLA leh Chairman MYC pawh in thusawiin Sorkar ruahmanna angin SEDP sem a ni hi lawmawm a ti a, miretheih tan eizawnna bul tanna leh tanhmun siam nan thil tha tak a ni a, ram tana thil tha tur ngaihtuah chunga SEDP hi sem a ni a ti a, SEDP kan dawn hi tangkai taka hmanga intohdelh tura tan la theuh turin beneficiaries te a chah a ni.

Pu M. Misael, Member Secretary & Project Director, DRDA chuan technical report peiin Lunglei District chhung (Assembly Constituency 6 ) khua leh veng tinah Village Level SEDP Committee 124 an awm a, Family Oriented SEDP hnuai ah hian Department leh Trade hrang hrang 9 ah chhungkaw 9000 tan hetiang hiang kum 2022-2023 Family Oriented SEDP chu a thawhkhatna Lunglei District tan kalpui a ni. Animal Husbandary & Veterinary hnuaiah chhungkua 4279 ( Rs 10, 69, 75, 000/-cheng nuai sangkhat sawmruk pakua singsarih leh sangnga ), Agriculture Department hnuiah chhungkua 1155 (Rs 288, 75,000/- cheng nuai zahnih sawmriat pariat singsarih leh sangnga), Commerce & Industries Department hnuaiah chhungkua 1755 (Rs 438, 75, 000/-cheng nuai zali sawmthum pariat singsarih leh sangnga), Fisheries Department hnuaiah chhungkaw 194 (Rs 48, 50, 000/- cheng nuai sawmli pariat leh singnga), Horticulture Department hnuaiah chhungkua 500 (Rs 125, 00,000/- cheng nuai za sawmhnih panga), Land Resources, Soil & Water Consevation Department hnuaiah chhungkua 1059 (Rs 264, 75,000/- cheng nuai zahnih sawmruk pali singsarih leh sangnga), Sericulture Department hnuaiah chhungkua 30 (Rs 7,50,000/- cheng nuai sarih leh singnga), UD & PA Department hnuaiah chhungkua 25 (Rs 6,25,000/- cheng nuai ruk singhnih leh sangnga) leh Tourism Department hnuaiah chhungkua 3 (Rs 75,000/- cheng singsarih leh sangnga) te an ni.

Attachment

  • Loading attachment...