Mizoram Agriculture Marketing Solution (MAMSol) in Bairabi Mini Trade Centre a cheng nuai 150 senga Cold Storage Facility a sak chu Agriculture, CoOperation etc Minister Pu C Lalrinsanga’n vawiin khan a hawng.

Khuallian Pu C Lalrinsanga chuan MAMSol hmalakna hnuaia thlai/thei vawn thatna peihfel ani chu kut hnathawkte tan Malsawmna anih ngei a beisei thu a tarlang a, chutih rualin a vawn thatna awm si a, thlai leh thei dah tur kan thar chhuak tam tawklo ang tih a hlauhawm a, he Cold Storage facility hian kuthnathawkte chu taima leh zuala thawk tura chona pe tu nise a duh thu a sawi bawk. Ram leh Hnam intodelh nih a hun tawh ani tiin State pawn atanga lalut/leitu ah ringawt tang lovin a thawnchhuak tu a tan te pawh a hun tawh a, Cold Storage facility ah pawh hian Ram chhunga thar chhuah ngei te chuan hmun luah tam ber se a duh thu a sawi a, dah khat reng turin tan lak a ngai a, thar chhuahna kawngah hma kan sawn a hun a ni a ti.

Ringtu nun leh thatchhiat a inhmeh lo ani tiin hmathlir kan neih te chu a taka pholang tur chuan taihmak a ngai a, kan tu leh fa lo la awm tur te tan kawng zawh chhunzawm tlak kan zuah sak a ngai a, Pathian hre reng chungin taima tak leh rinawm takin hma la ila malsawmna a awm thin a ni a ti a. Kan kawng zawh ah hian CoOperative Concept a kan chian a ngai ani tiin mimal a hmalak emaw thil puitlin harsa tak hi tanho chuan chakna a awm a, tih hlawhtlin a awl thin a, chu tanho na kalphung chu Cooperative Society thil tum ani a, tan ho chu a Mizo a, a kristian a, tanhona chu innghahna tlak ani tiin MAMSol ina kuthnathawkte tana a thil chhawpchhuah chu malsawmna ni turin mipuite hnenah duhsakna a hlan a ni.

Khual zahawm FCS&CA Minister Pu K.Lalrinliana chuan MAMSol ten kuthnathawkte ngaihtuah chunga ruahmanna felfai tak an siam chu thil chhinchhiah tlak tak ani tiin Bialtu a nihna ang pawhin lawmthu a sawi a, kut hnathawkte tharchhuah/dehchhuah vawn thatna chu Bairabi bakah a chhehvel khua a mipuiten tangkai taka hmang turin leh hlawkpui turin duhsakna a hlan a. Thlai, thei, sa etc vawn thatna Cold Storage facility chu Ram tam tak leh State tam takah an nei fur tawh a, Mizoram pawhin kan thlai leh thei tharchhuah te hlawkpui zawka kan dehral theih nan Cold Storage facility chu kan la mamawh belh zel dawn ani tiin kut hnathawkte pui turin Sawrkar chu a inhawng reng ani a ti a, Bairabi khua ah pawh thlai tam tak tharchhuah theihna a awm a, heng kut hnathawk te thawhrimna chu a riral mai mai loh nan Sawrkar chuan hmalakna tur kawng hrang hrang beng sikin a ngaihtuah reng thu a tarlang a, Mipuiten harsatna an nei emaw puih an ngaih na ah chuan Sawrkar a inhawng reng ani tiin Ram leh Hnam intodelh ni turin Sawrkar hmalakna chu tawiawm turin mipuite a sawm bawk a ni.
Eng pawh ti dawn ila hlawhtling tur chuan thawhrim leh tei rei peih a ngai ani tiin tih takzeta beih chuan rah tha seng tur a awm thin a ni a ti a, MAMSol te hmalakna chu mipuiten tawiawm in a tangkai thei ang bera chhawr turin duhsakna a hlan bawk a ni.

MAMSol hi Mizoram loneitute thlai thar man man zawka hralh a nih theihna tura September 2016 a din a ni a, MAMSol chuan Mizoram thei leh thlai te market a hralh chhuah hi a thil tum te zinga langsar ber a ni a, heng thei leh thlai tharchhuah te hi uluk taka enkawl an ngai a, an chhe awlsam em em a, an nunna te pawtsei a hun engemaw chen vawng tha turin cold Storage facility hi duan a ni. Tuna an hmalak mek na ah Mizoram loneitute swathing thar hmun hrang hrang atanga lei khawlin Mizoram pawnah an hralh mek a, an hmalakna avang hian sawhthing man pawhin san lam a pan chho zel a ni. Cold Storage chu pindan lian tak boruak vawt siam chawp a hnawn dan leh boruak rualkhai taka siam ani a, thei leh thlai, sa etc te chu hun rei tak a dah/vawn that theih a ni. Pindan tih vawh nan hian FREON gas hman niin hei hi sik sa tana pawilo (eco friendly) ani a, power supply hi phase thum (3) pek niin 3.5 degree celcius thelnga vawt tura duan ani. Pindan vawt panga sak nan hian cheng nuai 140 sen ani a, Civil Works, utilities leh power connection a tan cheng nuai 10 sen/hman ani bawk.

MAMSol Cold Storage Facility hi Mizoram Sawrkar a Commerce & Industries Department in Market Yard Development Scheme hnuaia a sak niin, a dung hi feet 69, a vang feet 32 leh a san zawng hi feet 12 a ni a, pindan panga, thlai metric Ton 20 zel dah theih a ni a, pindan zawng zawnga thlai dah that theih zat hi Metric Ton 100 niin, a sak hna hi M/S Jaiwal Engineering Works Pvt.Ltd Noida ten an thawk a, November 2017 a sak tan niin March 2019 ah sak zawh a ni.

Hawnna inkhawm hi Pi T.Lalmuanpuii, Chairman MAMSol in a kaihruai a, he hun ah hian Sawrkar Official, State Level CoOperative Society hruaitute leh Bairabi khawtlang hruaitu enge maw zat an kal khawm a, Pu Zorema Darkim, Managing Director, MAMSol in lawmthu sawina in hnu a khar a ni.