Nimin khan  khawvel pum huapin Kelek (Club Foot) te pualin Kelek te enkawlna kawnga INZIRTIRNA LEH Inkawhhmuhna Ni a ni a. Nimin tlai khan Mizoramah pawh World Club Foot Day  puala programme chu  Aijal Club-ah hman a ni.

Aijal Club a Kelek te enkawlna chungchanga inzirtirna hun buatsaih hi Pi Zohmingthangi Sailo, Chairman, Clubfoot Society of Mizoram chuan a kaihruai a. He hunah hian Dr.Lalnghakliana, Orthopedic Surgeon, Civil Hospital chuan Kelek awmzia leh enkawl dan powerpoint presentation hmangin a zirtirna a pe a ni.

Clubfoot Society of Mizoram hi 2012 kum khan Mizoramah din tan a ni a. India rama Kelek buaipuitu pawl Cure International Indian Trust (CIIT), Miracle Feets leh CPM te nen pawh thawhhona tha tak an nei mek a. 2012 kum, August thla-ah Health Department nen thawhhona thuthlung siamin hemi ni tang hian Civil Hospital Aizawl-ah Clubfoot Clinic pawh ningani apianga hawn a ni chho ta a ni. 2015 kum khan RBSK nen mumal zawkin thawhhona neih chhunzawm a ni chho leh a. Kelek vanga harsatna nei te chuan Helpline No. 8974054839 ah an hriat duh te an zawhfiah theih reng a ni a. Tun dinhmunah Mizoram chhungah pawh naupang kelek 73 lai hlawhtling taka enkawl an lo ni tawh a ni.