Agriculture Minister Pu C Lalrinsanga Cooperation Department enkawltu ni bawk chuan vawiin khan Mizoram Milk Producers' Co-operative Union Limited (MULCO), Thuampui a awm chu a tlawh a. MULCO hmunhma hrang hrang te fang kualin Board of Directors leh MULCO hnathawktute nen inkawmhona hun tha tak an nei a. Minister hi Registrar of Co-operative Societies Pi Ankita Chakravarty, IAS leh RCS Office a officer dang ten tawiawmin a hmunah MULCO Board Of Directors Chairman Pu Vanlalchhunga leh Board Member dangten an lo dawngsawng a ni.

Agriculture Minister, Co-operation Department enkawltu ni bawk Pu C. Lalrinsanga chuan hun hmasa lamah Cooperation Department a enkawl lai tehkhinin tunah MULCO chu a lian tawh hle a, bungrua che thei leh che thei lo assets te lian tak tak nei tawhin a thang nasa nia a hmuh thu a sawi a. MULCO chu coperative society anih angin a thawktu te chuan cooperative thil tum leh a kaihhruaina dan mumal tak awm te chu an hriatsa mah nise, ngai pawimawh a, cooperative society leh MULCO than chhoh zelnaah rinawm leh taima taka thawk turin a fuih. Cooperative dan te tuman an palzut a thiang lo tih sawiin Minister chuan hnathawktu ten Board of Directors an zah thiam a tul a chutiang bawkin Board of Directors pawhin an mawhphurhna te an hriat a pawimawh a ni,  a ti.

Pu C. Lalrisanga chuan tunlai market economy kan neih mek anga market hawi zawng leh a kalphung te zir chianga chumi anga inher rem a tul thu te sawiin MULCO hi tun aia hlawk zawka kalpui anih theih nan leh thawktu te hlawh pawh tun aia tha zawk pe thei tur chuan inzarpharhna kawng an zawn zel a tul tih a sawi tel bawk a. Neitu rilru pu theuh a hna thawk turin MULCO hnathawkte a chah a ni.

MULCO Board of Directors, Chairman Pu Vanlalchhunga chuan Pu C Lalrinsanga'n hun hmasa lama Cooperation Department a lo enkawl laia nasa taka MULCO hmasawnna alo ngaihtuah dan te, hma a lo lak tawh dante ngaihtuah letin  amahah beiseina sang tak an neih thu a sawi a. An hnathawh hriatpui tura an hmun hma a thlirpui vangin lawmthu a sawi bawk a ni.

MULCO Managing Director Dr. David Dailova Varte in MULCO hnathawh dan te, an kalphung te, an dinhmun leh harsatna an neih te tarlangin hun a hmang a ni.

MULCO hi Mizorama cooperative society, mipuiin an hriat hlawh tak leh an chhawr pawl tak niin cooperative society hna thawk tha tak a ni a. Kum 1984 a, AH & Vety. Department hmalakna a din niin 1995 atang khan indangin amahin a ding hrang ve tawh a. Kum 2018-19 chhung khan bawnghnute 20,08,030 litres an hralh a, hei hi kum 2017-18 a bawnghnute litre 18,09,405.4 aiin litres 1,98,624.6 in  tam zawk a, kum 2018-19 a bawnghnute hralhna  atangin Rs. 10, 76, 87,402.60 hmuh a ni a. Hemi kum chhung vekin bawnghnute product hrang hrang siam nan bawnghnute litres 2,82,860 hman niin a hralhna atangin Rs. 4,88, 35, 886 hmuh a ni. Tunah hian hnathawktu a nghet leh nghet lo mi 70 vel an awm mek a ni.