Vawiin chawhma khan Deputy Commissioner, Aizawl kaihhruaina hnuaiah Census 2021 buatsaihna atan a tihchhina “Pre-Test of Census 2021” chu Planning & Programme Implementation department Conference Hall ah Directorate of Census Operations, Mizoram ten an buatsaih a, Pu John LT Sanga,  Addl. DC, Aizawl chuan training hawnna hun neiin Pi Lalchhanhimi, SDC, Aizawl in Training hawnna hun hi a kaihruai a ni.

Pu John LT Sanga, Addl. DC chuan,” Hmalakna tur hrang hrang duan anih hian Census hi kan behchhan ber a ni thin a, chhan hrang hrang avanga zirchian ngai, endik ngai leh enlet a ngai a awm changte a tehfunga kan hman ber chu Census hi a ni,” a ti a,” India ram, mihring tam lama khawvel huap pawh a pahnihna hauh mek ah hian Census buatsaih hi hna hautak tak a ni a, Training hi tangkai taka chhawr a, Census kimchang tak kan neih theih nan theihtawp i chhuah theih ang u,” a ti bawk.

Pu S. Chatterjee, Deputy Director, Directorate of Census Operations, Mizoram chuan Pre-Test of Census 2021 ah hian Mobile application hmang a hna tam zawk kalpui anih tur thu a sawi a, Pre-test kalpui dan tur tlangpuite tar langin Census a tak a kalpui a nih hunah harsatnate a awm loh nan Pre-Test chhunga harsatna awm ang te chiang taka chinchhiah turin a chah bawk.

Pre-Test of Census 2021 hi 12.08.2019 leh 30.10.2019 chhungin India ram pumah kalpui tur a ni. House Listing Operations leh National Population Register a ziahluh hna hi 12.08.2019 leh 03.09.2019 chhung a neih tur a ni a Population Enumeration hi 10.09.2019 leh 29.09.2019 chhung a neih tur niin 30.09.2019 hian ennawnna neih a ni bawk dawn a ni. Pre-Test of Census atan hian Aizawl Municipal Local Council number 73 leh Phullen RD block thlan a ni a, Enumerators 10 leh Supervisors 2 ve ve in Pre-Test hi an kalpui dawn a ni.