No.3411/2021-2022

Aizawl, the 15th December 2021 : Agriculture Minister Pu C. Lalrinsanga'n vawiin khan National Bank for Agriculture and Rural Development (NABARD) in State Credit Seminar 2022-23 Regency Hotel a an buatsaih chu khuallian niin a hmanpui a, State Focus Paper 2022-23 a tlangzarh nghal a ni.

Pu C. Lalrinsanga chuan NABARD-in Mizoramah a bik takin lo neih leh ranvulh a eizawng tute leh thingtlang a cheng mipuite tana thil tha tak an tih chu mipui leh Sawrkarin an hlawkpui thu sawiin NABARD chungah lawmthu a sawi a. RIDF leh scheme dangte atangin tanpuina leh loan chi hrang vaibelchhe 1000 chuang NABARD atanga dawn a nih thu a sawi lang tel. Annual Credit Plan atana 2020-21 chhunga cheng vaibelchhe 1800 bawr ruahman atanga za zelah 73, cheng vaibelchhe 1324 tihfel a ni chu lawmawm tiin 2021-22 atana Annual Credit Plan an ruahman chu 100 a 100 tihfel anih theih nan tan la turin a fuih a ni.

State Focus Paper kaltlangin Mizoram economy siam thatna turin NABARD chuan ruahmanna peng hrang hrang a siam a, heng te hi Bank te tanpuina tel lo chuan a takin a thleng thei dawn lo tih sawiin Pu C.Lalrinsanga chuan tan la lehzual turin bank hotute a ngen a. Lo neih leh a kaihhnawih sector atan loan tam zawk pek a pawimawh thu sawiin hemi kawnga hian bank ten heng sector hi a bik takin ngaihpawimawh nise tiin a duh thu a sawi.

NABARD in Hmarchhak puma Regional Rural Bank zinga hna thawk 'Best Performing RRB Award' chu Mizoram Rural Bank dawng turah thlan a ni a, he Award hi Minister chuan MRB Chairman Pu V. Jaya Chandran hnenah a hlan a. Self Help Group hna thawk tha 3 thlanchhuah leh hemi kawnga Bank thawk tha 2 thlan –MRB, Reiek Branch leh MCAB, Siaha Branch te hnenah lawmman a hlan bawk a ni.

Pu V Jaya Chandra, Chairman Mizoram Rural Bank, Pi Lalfakzuali Leivang, General Manager/OIC Mizoram Regional Office; Pu Haokholal RBI Sub Office Aizawl te pawhin thu sawina hun neiin Credit Linkage atana hna an thawh dan te an sawi a ni. State Focus Paper sawizau chu Pu O P Mounglang, AGM, NABARD chuan a nei a, Angel Business Promoters leh TATA Trusts hnuaia awm NEIDA ten NABARD nen tangho a hma an lak dan te an sawi bawk a ni.

Kum 1995-96 atangin Rural Infrastructure Development Fund (RIDF) hnuaia project 677 tan NABARD in cheng vaibelchhe 1744.51 an ruahman tawh a chutah tang chuan vaibelchhe 1071 chu pek tlak a ni tawh a. RIDF hi PWD, PHED, I &WR, AH & Vety leh H &FW Department ten an chawr tangkai a. Warehouse Infrastructure Fund (WIF) atana project 111 hnuaiah cheng vaibelchhe 112.76 ruahman niin chutah tanga cheng vaibelchhe 79.56 chu pek a ni tawh a. Agriculture, Horticulture leh F, CS &CA Department te he Fund hi an hmang tangkai a ni.