No.3570/2021-2022
Aizawl, the 6th January 2022 : Vawiin khan Union Minister for Agriculture Pu Narendra Tomar leh DoNER Minister Pu G. Kishan Reddy te hovin Hmarchhak Agriculture Minister te chuan video conferencing kaltlangin Hmarchhak state hrang hranga lo neih leh tharchhuah chungchangte leh hengte kaihhnawiha an hmachhawp leh harsatna te an sawiho a. Agriculture Minister Pu C Lalrinsanga pawh he meeting ah telin Mizorama lo neih leh a kaihhnawih te, henga Sawrkar hmalakna leh hmachhawp leh harsatna awm te a thlen.

Pu C. Lalrinsanga chuan Ministry of Agriculture hnuaia Department of Agriculture & Farmer's Welfare in 10 percent GBS sum ruahmanna chu kum a tawp dawn tepa an tihfel thin avangin proposal thehluh te pawh sanction lamah harsatna a awm thin tiin sum ruahmanna te chu a hma lama release thin nise tiin a thlen a. Minister hian Mizorama oil palm chin hlawhtlin chho dante leh Sawrkar hmalakna te sawiin Sawrkar Laipuiin Oil palm chungchanga scheme thar a tlangzarh - New Mission for Oil Palm (NMEO-OP) ah beiseina sang tak a nei tiin oil palm rah phurhchhuah nana inkalpawhna kawng mamawh dante a thlen a. Hemi bakah hian oil palm tiak tha chi ram pawn atanga chaw luta, chungte chu Hmarchhak state te pe turin a ngen a ni a. Organic farming Mizoram in a kalpui dan pawh sawiin MOVCD-NER hnuaia khaw 485 a ram hectare 21000 a zau-ah he scheme hi kalpui mek a nih thu leh hemi atan hian Farmer Interest Group (FIG) 747 din a nih tawh thu te, Farmer Producer Company (FPC) 30 chuang, lo nei mi 22104 in an chhawr mek thu te a sawi a. Loneitu ten an tharchhuah phur nana an sum sen a sang avangin transport subsidy engemaw tal ruahmansak turin Sawrkar Laipui hotute a ngen.

Meeting ah Minister hian tlangram lo neih bansan nana tlangram te terrace a siam chu Mizoram Sawrkar in a ngaihpawhmawh dan leh hemi kawnga tan a lak dan te sawiin tlangram terrace a siamin lei hanna luangral mai tur chu engwmaw chen a ven theih thu a sawi a. Hei hian buh leh thlai chin nan ram tha tak a siam belh thei bakah khawvel in a buaipui sik leh sak inthlakdanglam mek ngaihtuahin hei hi thil tha a ni, a ti a. Hilly terracing chu ngaihpawimawha scheme duan nise tiin a thlen a ni. Pu C Lalrinsanga chuan sik leh sa inthlak danglamin loneituten thlai tana tui an mamawh irrigation ah harsatna an tawk chho mek tih sawiin hemi kawngah nizung chakna hmanga loneituten an tui mamawh pump leh lo lama sem dan chungchang Lift Irrigation chu ngaihpawhmawh nise tiin a thlen bawk a ni.

Lo nei miten an lo neihna hmun awlsam taka an pan theih nan leh an tharchhuah te awlsam leh rang taka an phurchhuah thei nan Farm Road/Link Road neih a pawimawh thu te thlenin hemi chungchang lo leh huan inkalpawhna tur project Mizoram Sawrkar in a thehluh chu ngaihpawhmawh sak turin a ngen a. Heng bakah hian Horticulture Development programme hnuaia hma lakna hrang hrang leh Bamboo Mission hnuaia hmalakna leh harsatna te a sawi lang bawk a ni.

Loneih kawnga tan lak tharna tur leh a kaihhnawih chungchanga DoNER a project 5 cheng vaibelchhe 183.2 hu; NEC a project proposal 4 cheng vaibelchhe 24.8 hu leh Ministry of Agriculture a project 1 cheng vaibelchhe 29.161 hu Mizoramin a thehluh chu ngaihpawhmawh sak turin leh sanction sak vek ngei turin Union Agriculture Minister leh DoNER Minister te chu a Pu C. Lalrinsanga'n a ngen a ni.

Meeting ah hian Sawrkar Laipui hotuten Hmarchhaka lonei mite tana Ministry of Agriculture in tanpuina a pek dan te leh scheme hrang hranga Hmarchhak state te thlen chin te an tarlang a ni.

Minister hi Commissioner & Secretary, Agriculture Pu J. Hmingthanmawia leh Agriculture Director Pu Rohmingthanga Colney leh a thawhpui ten an tawiawm a ni.