No.3569/2021-2022
Aizawl the 6th, January 2022: Delhi a Sawrkar laipui dawra kal, Rural Development Department changtu Minister Pu Lalruatkima chuan nimin January ni 5 khan Sawrkar Laipui Ministry of Rural Development hnuaia Officer pawimawh te an Office ah tlawhin a Department chan hnuaia hmalakna kal mek leh hmachhawp-te a sawipui a. Mizoram tana nasa zawka hmalakpui turin a ngen a ni.

Rural Development Minister chuan Dr. Biswajit Benerjee, Joint Secretary (Rurban), Sawrkar Laipui Ministry of Rural Development hmuin, Mizoram chhung Rural Development Block hrang hrang hnuaia Rurban Cluster siam belh a nih theihna tura December, 2021 thla tir lama an inbiak tawhnaa an sawidun leh Secretary pawhin lo enzui a tiam chu chak zawka hma laksak turin a ngen a. Secretary hian Rurban Cluster siam belh tur hian hmalak mek a nih thu Minister hi hrilhin, Mizoram mai ni lo India ram pumpui anga uluk zawka ennawn a nih bakah mamawhna a zira pek tur a nih avangin Ministry pawhin fimkhur takin hma a lak thu a sawi a, Mizoram bik erawh Minister-in a ngenna anga tihhlawhtlin sak ngei a nih a beisei thu a hrilh bawk a ni.

Rural Development Minister Pu Lalruatkima hian Pu Rajesh Kumar Singh, Director, Department of Land Resources, Ministry of Rural Development chu a pisaah hmuin Mizoram mamawh leh hmachhawp engemawzat a thlen a. Nimin vek khan Pu Umakant, Joint Secretary, Department of Land Resources, Ministry of Rural Devlopment chu a pisaah hmuh chhunzawm lehin, Pradhan Mantri Krishi Sinchayee Yojana (PMKSY) Version thar 2.0, Rural Development Department, Govt. of Mizoram-in DPR a submit tawh chungchang a sawipui a. DPR siam tawh atanga Ministry in allocation a siam 45841 Hactare (Rs. 12,835.48 lakh) atana hmalakna tur chu tipung tura a ngenna chu Joint Secretary chuan a tul anga hma a lo lak tur thu Minister Pu Lalruatkima a hrilh a. Hei bakah hian Minister ngenna angin PMKSY Version 2.0 atana sum hman tur chu tun thla chhunga release an tum thu a hrilh bawk a ni.