No.3568/2021-2022
Aizawl the 6th, January 2022: Vawiin khan Higher & Technical Education Minister Dr R Lalthangliana chuan SAD Conference Hall, MINECO-ah Mizoram Sawrkar hnuaia College Principal zawng zawngte ko khawmin meeting a neihpui.

Sawrkar Laipui Education Policy thar - New Education Policy (NEP) 2020 chungchanga hmalakna sawiho a ni a. Mizoram Sawrkar hnuaiah H&TE Commissioner kaihhruaina hnuaiah Task Force din niin meeting an nei tawh a. Mizoramah NEP hman tan a nih theih nan inkaihhruaina pawimawh te chipchiar taka zirho leh sawiho a ni a. He policy tharah hian kalphung inthlak a tam dawn avangin college zirtirtute bakah mipui mimirah inhrilhhriatna leh sawihona zau zawk neih a tul dawn a ni, tih meeting ah hian sawi lan a ni. Mizoram College in affiliation a neihna Mizoram University pawhin Task Force dinin hmalakna thui tak an neih tawh thu tarlan a ni bawk. NEP hnuaia Mizoram State in kan hmalakna chak lehzuala kalpui ni se, he policy in kaihhruaina a siam zingah implement theih ang te kalpui tan ni se, tiin an rel.

NAAC accreditation chungchang sawiho a ni a. Accreditation la nei ngai lo College pahnih an awm mek a. Accreditation hmu tawh zingah validity tawp tawh an awm bawk. Government Serchhip College chuan tun hnaiah NAAC accreditation ah A Grade an hmu thar a. Tun dinhmunah Mizoram College hrang hrang zingah A Grade nei mek awm chhun an ni.

Mizoram Sawrkar chuan RUSA 1 a khar fel tawh a. RUSA 2 ah awm mekin hei pawh a hmawr bawk fel a ni tep tawh tih meeting-ah tarlan a ni. RUSA hnuaia zirtirtute hlawh chungchangah sawrkar laipui vawi engemaw zat dawr a ni tawh a. A hun takah zirtirtute hlawh tur fund release a nih theih nan Sawrkar laipui phut angin Utilisation Certificate a hun takah thehluh a ni a. Amaherawhchu Sawrkar Laipui Ministry of Finance in OM thar a tihchhuah ah funding system kalphung a thlak danglam vek a, he kaihhruaina thar zawm kim lo chu Ministry tinah funding pek tlai a ni ta a. Minister Dr R Lalthangliana’n zirtirtute hlawh tur fund an pek chhuah thuai theih nan Ministry vawi tam tak a dawr a. DO letter leh phone hmang pawhin vawi tam tak a dawr a. Um chhuah theih thuai beisei a ni. Finance Ministry inkaihhruaina tharin a phut ang 99% vel Mizoram Sawrkar chuan a peihfel tawh a, tun kar chhung hian za ah za zawhfel theih an beisei thu ngaihthlak a ni bawk.

Non teaching staff leh staff dang indaihlohna chungchang sawiho niin Minister chuan college tin te an dinhmun chiang tak ziaka sawrkarah hriattir turin a hrilh a ni.

Vawiin meeting-ah hian H&TE Commissioner Pi Esther Lal Ruatkimi, Director leh hotu lian dangte bakah School Education Secretary Pu Lalzirmawia Chhangte, School Education Director, Spokesperson & State Nodal Officer on COVID-19 te pawh he meeting-ah hian an tel.