No.3567/2021-2022
Aizawl the 6th, January 2022: Vawiin chawhma khan Govt. High School, Lunglei ah Lunglei District huamchhunga kum 15-18 inkar thalaite Covid 19 vaccine pek tan a ni. Hemi puala hawnna program buatsaihah Lunglei Deputy Commissioner & Chairman, DLTF Pu Kulothungan A chu khuallian a ni.

Covid 19 vaccine pekna hun hi Dr. Lalrinthangi, District Immunization Officer, Lunglei in kaihruaiin Pu Kulothungan A chuan tun hnaiah India ram hmun hrang hrangah Covid 19 hri kai nasa takin a pung chho leh meka, Lunglei District ah pawh hri kai hmuhchhuah a pung chak leh hle a ni a ti. Lunglei District chu Covid 19 vaccine pek chhuah ah Mizorama ti tha berte zing ami niin first dose 94.9% leh 2nd dose 85.1% pek chhuah anih thu sawiin H&FW Department thawktute bakah DLTF leh VLTF member te thahnemngai taka hma an lak avangin lawmthu a sawi a ni. Kum 15-18 inkar thalaite Covid 19 vaccine kim taka la tura hma la theuh turin H&FW Department thawktute, District Education Officer, High School Head Master te a chah a. Lunglei District thalai vaccine la thei zawng zawngte chu vaccine la ngei turin a chah bawk.

Dr. Lalrinthangi, DIO chuan kum 15-18 inkar thalaite hi sorkar laipui ruahmanna siam angin Covaxin pek anih tur thu sawiin Covaxin 1st dose pek ni atanga ni 28 hnu ah 2nd dose pek leh an ni ang. H&FW Department chhinchhiah danin Lunglei District huamchhungah vaccine la thei target population mi 9532 an awm a. Vaccine pe chhuak tu tur healthcare workers te tan nimin khan Orientation program zawhfel niin vawiin a bultan ni hian Govt. High School, Lunglei ah vaccine hi pek chhuah nghal a ni a. Naktuk atangin 15-18 vaccination hi District hmun hrang hrangah kalpui nghal tum a ni.

H&FW hotute report danin Lunglei District chhunga Covid 19 dose la kim tawh Healthcare worker, Frontline worker lek kum 60 chunglam natna benvawn nei te tan January ni 10, 2022 atangin Covid vaccine Booster dose pek chhuah tum a ni.

Lunglei District huamchhungah heng Centre-ah te hian naktuk chawhma dar 10 atangin 15-18 vaccination hi kalpui tum a ni - Pukpui Sub Centre, Serkawn Clinic, Zohnuai Sub Centre, Bazar veng Sub Centre, Venghlun Sub Centre, Zobawk North Sub Centre, Zobawk South Sub Centre, Lunglei South Main Centre,  Electric Veng Sub Centre, Farm Veng Sub Centre, Ramthar Sub Centre, Salem Veng Clinic, Lunglawn Sub Centre, Luangmual Clinic, Theiriat Sub Centre, Vaisam Sub Centre, Runtung khua, Pachang leh Hauruang Sub Centre. Vaccine session site hi District hmun dangah te ruahman belh zel tum a ni. 

CoWIN Registration hi vaccine lakna hmuna tihfel tur a ni a. Vaccine la tur ten Aadhaar card ken tur a ni a. Aadhaar nei lo ten an zirna School Student ID a hman theih bawk a. Heng ho nei lo tan Pan card, ration card a hman theih bawk ang. Phone kaltlanga CoWIN Portal-a in register a ngaih dawn avangin phone ken tur a ni a, beneficiary-in phone an neih lo chuan an chhungte phone pawh an hmang thei ang. He phone number ngai hi second dose lak hunah pawh hman chhunzawm tur a ni.