3118/2022-2023
Aizawl 21st December 2022: Vawiin khan Agriculture Minister Pu C. Lalrinsanga chuan SEDP hnuaia vaimim chingtute hman tur vaimim hersawmna khawl (maize grinder) semna hun a nei a. He hunah hian tualchhung khawl siam Buhpawl channa (chaff cutter) leh Telhawng cutter te pawh pholan a ni.

Directorate of Agriculture Complex, Aizawla khawl semna programme buatsaihah hian Pu C. Lalrinsanga chuan Agriculture and Allied Sector-te chu ram changkangte hmasawnna bulthut an nih thu a sawi a, ram economy thanna chu Agriculture Department-a thawktute mawhphurhna a nihna chen a awm thu a sawi bawk. Ramchhunga tharchhuah mai bakah thawnchhuah tam zawk a awm theihna’n hmabak thui tak la awm mahse, hmathlir thui tak neia hmasawn zawnga kal zel a tul thu sawiin khawl tha chakna chhawra, loneitu ten an kutkawiha tharchhuah tam zawk (mechanisation, privatisation, large scale production) an neih chu Chief Minister pawhin a ngaihpawimawh thu a sawi bawk. Thingtlang lo neih tihtlem leh ngelnghet zawka loneitu ten eizawnna an neihna tur sawrkarin a ngaihtuah zel a ni, Minister chuan a ti a. Nikkum lama SEDP hnuaia vaimim chin chu sazu leh fall army worm ten tihchhiatsak mahse, vaimim tharchhuahte chu khawchhunga mamawhna hrang hrangah tangkai taka hman a nih thu a tarlang a ni. Krismas thlen hmaa khawl semna hun buatsaih a ni chu lawmawm a tih thu sawiin, loneitu ten lo an vah hma ngeia vaimim hersawmna khawl a awm tih an hriat chuan phurtharna a pek ngei a beisei thu a sawi bawk a ni.

He hunah hian Agriculture Department-a Executive Engineer Pu Lalchhanliana chuan vaimim hersawmna khawl chungchangah report a pe a. Thingtlang loneitu ten awlsam taka an hman theih tur vaimin herna khawl (maize grinder) man tlawm, zangkhai leh her chak bawk si leinan SEDP plan-ah pawisa dah a nih thu a sawi a, Rashtriya Krishi Vikas Yojana (RKVY) atang pawhin engemawzat lei theih beisei a nih thu a tarlang bawk. Vaimim hersawmna khawl hi open tender hmangin department-in an zawn hnuah Lalzui Research Foundation, Salem Veng, Aizawl te khawl siam chu thlan a ni a. He khawl hi Rs 34,944 man niin, a khawl pawttu ber (prime mover) hi electric motor 3 hp a chak a ni a, ina kan current pawh (domestic line 230 volt) hmanga tihnun theih a ni. Kg 25 leka rit niin, vaimim nuaisa kg 275 vel darker khata hersawm thei tura ngaih a ni.

Sawkar laipuia Department of Science & Technology hnuaia din National Innovation Foundation aiawhin Pu R. Lalbikzuala chuan tualchhunga khawl siamtute an puih dan hrang hrang report a pe bawk.

Vaimim hersawmna khawl semna programme hi Agriculture Department Secretary Pu J. Hmingthanzuala chuan a kaihhruai a. Agricuture, Fisheries leh FOCUS hnuaia thawktu ten an telpui bawk a ni.