3119/2022-2023

Aizawl 21st December 2022: Vawiin khan UD&PA leh PHE changtu Deputy Chief Minister Pu Tawnluia chuan SIPMIU hnuaia hmalakna - 10 MLD Sewage Treatment Plant leh Sewarage Network a hawng a. He hunah hian Minister Pu Robert Romawia Royte chu khual zahawm niin MLA 3 - Pu C.Lalmuanpuia, Pu Ramthanmawia leh Pu H.Biakzaua te bakah Aizawl Mayor Pu Lalrinenga Sailo, Deputy Mayor Pu R.Thanglura leh mi pawimawh dangte an tel a ni.

Pu Tawnluia chuan Mizorama a hmasa ber ni turin mihring thli leh tui bawlhhlawh sawngbawlna hmun Sewage Treatment Plant hawn a ni ta chu lawmawm a tih thu a sawi a. Khawpui a than dawna thil pawimawh em em - khawpui thianghlimna, faina leh hriselna kawngah tuna Sewage Treatment Plant leh Sewarage Network hawn tak hi a tangkai hle dawn a ni, a ti. Bawlhhlawh thenfai leh a paihna hmuna paih mai a tawk tawh lo a, bawlhhlawh paih vum thur hian sik leh sa, boruak a tihchhiat avangin mihring hriselna atan bawlhhlawh sawngbawl a tul tak meuh tih Deputy Chief Minister chuan a sawi a. Chutiang sawngbawlna tangkai tak, Aizawl veng hrang hrangin an chhawr theih tur hawn a ni chu hmasawnna duhawm tak a ni, a ti. Pu Tawnluia chuan UD&PA leh PHE kaltlanga Mizoram khawpui leh khaw hrang hrang te hmasawnna leh faina atana hma an lak dan te he hunah hian a sawi a. SIPMIU nihphung leh thil tum te sawifiahin sewage treatment piah lamah Aizawl hmar lam chawmtu tur tui thianghlim lak dan buaipui mek a nih thu te a sawi bawk.

Pu Robert Romawia Royte pawhin thu sawiin SIPMIU hmalakna hlawhtlinna hmuh a ni ta leh Aizawl veng hrang hranga chhungkaw tam takin an chhawr tan mek chu lawmawm a tih thu a sawi a, he project hlawhtlinna tur atana tha thawhtu zawng zawng chungah lawmthu a sawi a ni. He project hlawhtling mek chhawrtu zingah a bial chhung veng hrang hrang an tel thu a sawi a, a bik takin a bial tan malsawmna ropui tak a nih thu a sawi. Minister chuan tuna SIPMIU hmalakna hi faina leh thianghlimna piah lamah himna atan a pawimawh tih a sawi a. In atanga tui leh thli englai pawha chhuak hian leimin a siam thei a, chuvangin mumal taka sawngbawl a ngai tih sawiin leimin leh lei che tur venna atan SIPMIU hmalakna hi a tangkai dawn, tih he hunah hian a sawi bawk a ni.

SIPMIU Sewage Treatment Plant hi Aizawl khawpui hmar chhak lam Chite lui kamah kum 2013 atang khan sak tan a ni a, tunah hian zawh fel tawh a ni. State Investment Programme Management & Implementation Unit (SIPMIU) in North East Region Capital Cities Development & Implementation Programme (NERCCDIP) hnuaiah Asian Development Bank (ADB) sum hmanga a buatsaih a ni.

10 MLD Sewage Treatment Plant (STP) hi mihring thli leh tui bawlhhlawh sawngbawlna hmun a ni a. He project atan hian sum cheng vaibelchhe.26.76 sen ral niin chhungkaw 12,000 hman tangkai theih tura ruahman a ni. STP hi Aizawl khawpui chhunga Local Council 16 in an hman theih tura ruahman a ni a, tun dinhmunah heng Local Council/Veng pakua (9) -Ramthar Veng, Ramthar North, Chite Veng, Armed Veng, Armed Veng South, Chhinga Veng (hmun thenkhat), Saron Veng, Bethlehem Veng leh Bethlehem Vengthlang ten an chhawr tangkai mek a ni. Hengte bakah hian veng pasarih (7) - Tuithiang, Aizawl Venglai, Electric Veng, Dawrpui, Zarkawt, Chanmari leh Ramhlun ‘S’ (hmun thenkhat) te hi huam theih chinah an awm a, rokhawlhna avangin tun dinhmunah chuan huam tel rih loh an ni.

STP hian 10 MLD (liter maktaduai 10) chuang ni khatah a sawngbawl thei a, hei hian chhungkaw 12,000 tan connection a nei thei a ni. Tun dinhmunah hian chhungkaw 4326 in connection an nei tawh a, in 2012 chu thlunzawm a ni tawh a ni.

Primary & Secondary Sewerage Networks 45.95 Km Sewerage Network (SEW) siam hna hi ruahman sa anga thawh zawh ni lo mahse ruahmana aia tam hnathawh a ni thung a. He hnathawh nan hian cheng vaibelchhe 56.76 sen ral a ni bawk a ni. Main sewer pipe hi Kilometer 28.26 phum a ni a, uPVC pipe hi kilometer 51.81 phum leh siam a ni bawk a. Manholes 1387 siam a ni bawk a ni.

Site/Land Development & Approach Road to STP hnathawh nan hian cheng vaibelchhe 3.43 hman niin zawh fel vek tawh leh hman mek a ni bawk.

STP hi uluk taka enkawl reng ngai leh vil reng ngai a ni a. Heng atan a sum senso tur hi Connection Fee leh User Charge atanga ruahman tur a ni ang. Connection Fee leh User Charge hi a tul angin sawrkarin a ruahman thin anga, electric bill leh tui bill ang thoin thla kipin bill chawi thin a ni ang. STP in a huam chin vengah chuan Individual Septic Tank leh Open/Pit Latrine te hi nuai bo vek tura hmalak a ni dawn a. Sewer line kalna veng a connection lak remchang zawng zawngte chu connection nei vek tura beisei an ni bawk.

Vawiina STP hawnna programme ah hian Planning Secretary Pu Lalmalsawma Pachuau chu Chairman a ni a. SIPMIU Programme Director Pu Lalrothanga chuan technical report a pe a. PHE E-in-C Pu HC Lalnunzira’n lawmthu sawiin hun hnung a khar a ni.

STP CONNECTION NEITE TIH TUR LEH TIHLOH TUR 

TIH TURTE:
1. Inthiarna hmunfai taka vawn tur.
2. Inthiar zawhah tui in fai takin tlen thin tur a ni.
3. Tui chhe paih na fai taka enkawl tur.
4. Kan ek in a lo in block palh emaw tui chhe paihna ah harsatna awm a nih pawhin mahni in atanga main sewer line (main road) thleng chu mahni a buaipui thin tur a niang.
5. Sewer main line-ah enge maw fel lohna a awm a nihchuan a enkawltute hriattir vat thin tur.
6. Tui dehna hmun leh inbualna hmun atui luan chhuah na ah bawlhhlawh dan na / chhihri dah ngei ngei tur a ni.
7. Sewer main line khawih a nih dawn in kan ekin leh tui dehna hman danah hnathawk tute thu kan ngaichang thin tur a ni.

TIHLOH TURTE:
1. Mihring atanga chhuak bawlhhlawh nilo bawlhhlawh dang ek inah thlak loh tur.
2. Ek fun paih loh tur a ni a – damlohna leh theih loh na avanga ek fun ngai a awm a nih pawh in a funna tello in ek chauh paih thin tur.
3. Pawnchhia leh hmeichhe hman chi thilte paih loh tur.Eg:- Pad, diaper, lapua, bandages leh a dangte.
4. Rantalh na bawlhhlawh leh Saruh lam chi reng reng paih loh tur.Eg:-Ar hmul leh a vunte, vawk, bawng, sangha leh thil dang reng reng tal hna thli leh bawlh hlawhte paih loh tur.
5. Plastic lam thil reng reng Sewer line a lut tura paih loh tur.
6. Sewer main line-ah harsatna a lo awm palh in mahni thua Man-hole te lo khawih loh tur.