No.2972/2020-2020
Aizawl, the 11th July 2020 : Nimin khan Agriculture Minister Pu C. Lalrinsanga'n Sialsukah thlai atanga hriak herchhuahna khawl Oil Expeller, Agriculture Deparment in an bun a hawng a; Sumsuih a SEDP hnuaia vaimim chingtu chhungkaw 23 hnenah hlo kahna Sprayer Department in an ruahman a hlan a ni.
Sumsuih a sprayer semna programme tawi teah Pu C. Lalrinsanga chuan Aizawl chheh vel khua ten Aizawl khawpui nitin mamawh an phuhruk leh zual theih nan Department chuan kuthnathawktute leh loneitute hma lakpui turin ruahmanna hrang hrang a kalpui mek a, a kalpui zel dawn tiin kuthnathawktute dinhmun chawikan chu Sawrkar thil tum lian tak anih thu a sawi. SEDP hmalakna chungchang sawiin vaimim tharchhuah tam theih nan, kuminah Mizoram pumah beihpui thlakin vaimin chin uar a ni a, a hralhchhuahna lamah harsatna a awm dawn lo tiin loneitute chu hlawhtling ngei tura tan la turin a fuih a. Hripui lengin Sawrkar hmalakna leh ruahmanna siamsa te a tihkhaihlak thu sawiin heti chung hian a theih ang angin loneitute hmasawnna atan tan lak zel Department in a tum thu a sawi lang bawk.
Sialsuk a Oil Expeller hawn naah thu sawiin Agriculture Minister chuan Sialsuk tlangdunga khaw hrang hrang te chu potential area tha an nih angin an tharchhuah te tihpun a nih theih nan kawng hrang hranga loneitute hmalakna chu Department pawhin enpuiin a theih ang angin a pui zel dawn, a ti a. Hriak herchhuahna khawl bun pawh chutianga hmalakna chikhat a ni tiin mahni tharchhuah theih kan tihpun chuan phaia pawisa luangchhuak tur kan dang thei anga, sum kan thawhchhuah ang ang te chu kan ram sumbawmah a lut anga, hei hian nasa takin kan state economy kan chawisang thei dawn tiin loneitute thawhrimna chu Pathianin mal a sawm thin tih hre reng chunga tan la turin a fuih a ni.
Hripui leng mekin Budget chhawpchhuah tawh te a tihbuai dan sawiin Minister chuan sawrkar sum lak luh a mumal thei rih lova, ruahmanna hrang hrang duansa te kalpui a harsa a, SEDP a hmalakna tur pawh a tithuanawp tiin mahse heti chung hian theih ang angin Sawrkar leh Department-in intodelhna lam hawi leh economy than chhohna turin hma a la zel dawn a ni, a ti.
Thlai hriak herna khawl hawnna leh Hlo kahna semna hun hi District Agriculture Officer, Aizawl Pu Lalsanglura Sailo in kaihruaiin technical report chu Pu Lalringliana SDAO (Sadar) in a pe a. Samlukhai, Sailam leh Sumsuih a chhungkaw 52 in thlai hriak pai chi rapeseed an ching mek a, an tharchhuah te hi he khawla herchhuah a ni dawn a ni. Hetiang hmalakna hi Department chuan khaw dangah pawh tih an tum mek a ni.
Minister hian Department hma lakna pakhat Sub Mission on Agro forestry hnuaia loneituten an tangkaipui theih tur leh an hlawkpui theih tur thing phunna programme pawh Sialsukah a hmanpui nghal bawk a ni.
Attachment
- Loading attachment...
