No.2973/2020-2020 

Mizoram sawrkara Health & Family Welfare Department Secretary Pu H.Lalengmawia, IAS chuan vawiin khan District Hospital Champhai tlawhin, TrueNat Quattro Mini PCR bunna tur hmunhmate, Dialysis Unit, High Dependency Unit, Special Newborn Care Unit (SNCU) leh Hospital Ward-te tlawhkuala a enfiah hnuah Doctors' Lounge-ah thawktute meeting a neihpui.

Pu H.Lalengmawia chuan District Hospital Champhai chuan Infrastructure changtlung tak a nei a, hmanraw mamawh angte pawh a tul ang zelin sawrkarin a ngaihtuah dawn thu sawiin, Dental Surgeon thlaktu tur a lo thlen hma chuan a pangngai chu lo awm rih tura tih anih thu leh  CMO nghet nei thei tura hmalak vat anih tur thu a sawi a. State sawrkarin Health Sector tihchangtlung kawngah theihtawp a chhuah thu sawiin, post hrang hrang 734 la tura nikum lama tih tawh chu Covid-19 hripui lengin a nangchin vanga engmah tih theih rih loh ani a, loh theih loh bik erawh chu Chief Minister leh Health Minister-te hmalaknain tih theih tura ngaih a ni, a ti a. Doctor indaihlohna nasa tur venna turin an pension hun chu kum 60 atanga 62 a pawhsei anih thu leh hei hian Sawrkarin an welfare a ngaihpawimawh zia a lantir a ni, a ti bawk.

Champhai district chu ramri hrula awm hmun pawimawh bik tak anih angin sawrkarin a ngaihven reng thu pawh sawiin, Malaria, Mental Health, Elderly leh prog dangah district ti tha an ni a,  thawktute thawhrimzia sawrkarin a hriatpuia, phurna a pek thu a sawi a. Health & Family Welfare Department hnuaia hmalakna leh hmasawnna tur awmte inhrilhhriat zung zung a tul thu sawiin, harsatnate awmte pawh inthlahrung hauh lova thuneitu sang zawkte hnena thlen thin turin a sawm a. Health Secretary chuan Covid-19  hripui do kawnga thawktute  hah zia a hriatpui thu sawiin, chawlh awm lova rim taka thawktute chu Covid-19 hrileng kian hun tur hriat anih loh avangin  inthlahdah mai lova thahnemngai taka thawk chhunzawm zel tura chahin, a te ber atanga lian ber thlenga inpekna chuan hotute mit a tlung thu a sawi bawk.

Damdawiina thawktute chu Covid-19 laka mipuite  fimkhur tur leh inven dan turte chiang taka hrilh hre thin tura chahin, Doctor-te thu sawi chu an zawm thina, Doctor ze dik tak innghahna leh rinngamna  lanchhuah tir a tul a ni, a ti a. Uchuak taka Covid-19 hripui leng hlauhna chuan harsatna dang, rilru lam thlenga a nghawng theih avangin mipuite thlamuana fimkhur dan kawng hmangte kawhhmuhtu nih tum turin a fuih a,  in chezia leh awrawlah  mipui mit a fu thup a ni, a ti  bawk.

Pu H.Lalengmawia chuan Champhai district-a thawhhona tha tak awm chu fakin, mipuiin hriselna lama thawktute chunga beiseina sang tak an neih chu hmangaihna, lainatna leh dawhtheihna nena dawngsawnga chhanglet thin turin a fuih a, an tawngkam leh khawsazia in thinlung leh tisa damna a thlen tih vawng reng turin a chah bawk a ni.

He hun kaihruaitu Dr. R.Lianmawia, CMO Champhai chuan hun chep tak kara Health Secretary-in a hmun ngeia kalchilha hmunhmate enfiaha meeting a neih pui vangin lawmthu a sawi a. CMO Champhai huamchhung dinhmun tlangpui leh hmalaknate tarlangin mamawh angte a thlen a. Dr. Zatluanga DMS Champhai hnen atangin District Hospital Champhai dinhmun tlangpui leh mamawhte ngaihthlak a ni bawk.

Pu Lalsawma Pachuau, Joint Director (F&D) leh Dr. Vanlalrengpuia, State Programme Manager, National Health Mission te hnen atangin thusawi ngaihthlak a ni a.  Dr.J.Lalramchhuanga, Senior Specialist, Leader, Covid-19 Treatment Team hnen atangin Covid-19 hri kaite enkawl leh buaipui dan tlangpui ngaihthlak a ni bawk.

Health Secretary hian Champhai district tan PPE leh hmanraw dangte a hlan hnuah CMO Dr. R.Lianmawia chuan lawmthu sawina neiin meeting hi a titawp a ni.