Nimin (7.6.2019) khan Agriculture Minister Pu C. Lalrinsanga chuan MZP Sub-Headquarters West Phaileng ten HSLC leh HSSLC zirlai pass tharte chawimawina hun Dinthar Community Hall, West Phaileng-ah an buatsaih chu a hmanpui a, he hun hi Deputy Chief Whip leh bialtu MLA ni bawk Pu Lalrintluanga Sailo pawhin a hmanpui a ni.

Agriculture Minister Pu C. Lalrinsanga chuan zirlai naupang HSLC leh HSSLC pass tharte chu  duhsakna hlanin, chawimawina programme chu West Phaileng hmachhuan la ni turte pholanna kawngkhat a nih thu a sawi a, zirlai te chu West Phaileng mai ni lo, ram leh hnam tan chhenfak awm ni turin leh ram hmangaihna thinlung (nationalism) pu turin a fuih a. Zirlai naupangte a fuihnaah Minister chuan tunah an hlawhtlinna chu an zir zelna kawngah, a bul tanna chauh anih thu leh a bak kawng thui tak zawh tur an neih thu te a sawi a. Chutih rualin zirlai hlawhchham te chu hei hi chonaah la in, an ngaihtuahna ti fip a, vawikhat hlawhchhamnaah beidawng mai lova hlawhtling ngei tura an zirna kawnga theihtawp chhuah turin a fuih a ni.

Pu C. Lalrinsanga chuan nationalism chungchang sawiin hnam tana mahni theihna zawnah theuh theihtawp chhuah a ke penna chu nationalism a ni a, party ta bik a ni lo a, mahni ram leh hnam tana thahnemngaihna rilru put a ni, a ti a. Mizo hnam tana hma hruaitu leh ram tana thawk te chu nationalists an nih vek thu sawiin zirlai te chu tun atanga hetiang rilru pu a, hnam dinchhuahna pawchhuak  thei ni turin a fuih a, Hnam dangte lehpel a, Mizoram leh Mizo te chu khawvel hriat a pholangtu ni turin a fuih bawk a ni. 

Ei leh bara intodelhna chu Agriculture Minister anih angin a rilruah a lian hle tih sawiin, mahni sum dehchhuah leh thawhchhuah ngeia Budget siam a hna thawk leh chet lak hun chu a nghahhlelhawmin a chakawm a, a hun hi hlat deuh mah ila, mahni zawnah theuh thahnemngai taka chet kan lak chuan kan intodelh thei a ni, a ti a. Mahni choka luahlum tu chakkhai zualpui chu hnam dang tharchhuah ni lovin Mizo tharchhuah leh dehchhuah in luah lum tur a ni, tih hi a ngaihdan a ni tiin hemi kawngah hian Agriculture Department chuan theihtawp chhuaha tan lak an tum thu a sawi a ni.

Pu C. Lalrinsanga chuan ram economy leh zirna chu an inthlunzawm tih sawiin zirlai thiamna kal zelin economy a ti hmasawnin a chawinung thin tiin zirlai naupangte chu Sawrkar hna thawh ngawr ngawr ngaihtuah lova mahni kutkawih leh thiamna hmanga hlawhtling taka entrepreneurship te kalpui theitu ni turin a fuih a. Zirna hian academic line a thiamna a ken tel bakah kawng hrang hrangah mihring theihna sawrchhuah chu a tum ani a, chuvangin mithiam zawkte pawhin education hi education and human ressources development an tih thu te sawilang bawk a ni.

Agriculture Minister hian W. Phaileng atanga Class X leh Class XII a Distinction a pass zirlai naupang 4 hnenah Special Citation a hlan a, hemi bakah cheng 5000 theuh a hlan tel bawk a ni.

He hun hmanpuitu dang Deputy Chief Whip leh bialtu MLA ni bawk Pu Lalrintluanga Sailo chuan zirlai hlawhtlinna phenah zirtirtu thawhrimna leh inpekna a awm tiin a bial chhunga zirna tih hmasawn nan theihtawp chhuah a huai taka hmalak a tum tih a sawi a. Zirna leh hriselna lamah mipui mamawh phuhru turin Sawrkar chuan huai takin hma a lak tur thu pawh a sawilang bawk a. Zirlai naupangte chu mahni inrintawkna nei tur a fuihin an kal zelna turah duhsakna a hlan a ni. Pu Lalrintluanga Sailo hian West Phaileng HSS chu projector leh Gospel Centenary High School chu computer set khat a hlan a ni.

He hunah hian zirlai pass thar 82 hnenah MZP Sub-Headquarters West Phaileng hian citation an hlan a ni.