Vawiin khan Lawngtlai BNRGSK Hall-a counting hall ruahmanah June ni 6-a Lai Autonomous District Council (LADC) hnuaia 5-Lungtian MDC Constituency leh Chakma Autonomous District Council (CADC) hnuaia 9-Ugudasury South MDC Constituency-a by-election neih zawh taka vote tlate chu tluang takin chhiar zawh a ni.

Polling station 4 awmna LADC hnuaia 5-Lungtian MDC Constituency-a vote tla 1188 atanga vote 593 hmutu Mizo National Front (MNF) candidate Pu Sanghuliana Mualchin chuan a khingpui vote 591 hmutu rorel lai Indian National Congress (INC) candidate Pu H. Lungrualkima chu vote 2-in a hneh a. He bialah hian NOTA-ah vote 4 a tla.

Polling station 2 awmna CADC hnuaia 9-Ugudasury 'S' MDC Constituency-a vote tla 1469 atanga vote 820 hmutu rorel lai Mizo National Front (MNF) candidate Pu Charan Singh Chakma chuan a khingpui vote 615 hmutu Bharatiya Janata Party (BJP) candidate Pu Susen Chakma chu vote 205-in a hneh a. He bialah hian NOTA-ah vote 34 a tla bawk.

He'ng MDC bial pahniha by-election-a thlan tlinte hnenah hian Returning Officer Dr Andrew H. Vanlaldika MCS chuan thlan tlin an nihna certificate a hlan nghal a ni.

Heti hian LADC-a elected MDC seat 25 awmah INC-in seat 16, MNF-in seat 8 leh Independent-in seat 1 an chang a. Independent MDC hian INC thlawpin, thlawptu 17 neiin INC-in sawrkar an siam a. CADC-a elected MDC seat 20 awmah MNF-in seat 8, INC-in seat 7 leh BJP-in seat 5 an chang a. INC MDC 3 leh BJP MDC 1 thlawpin MNF an sawrkar mek a ni.