Vawiin chawhma kha Youth Hostel, Luangmualah Luangmual Multipurpose Co-Operative Society(LMCS) Ltd khawmpui lian vawi 9-na chu Cooperation Minister Pu C. Lalrinsanga chuan khuallian niin a hmanpui.

Cooperation Minister Pu C.Lalrinsanga chuan Cooperation movement chu mihringte hmasawnna tura thawhhona awmze nei, Siamtu Pathianin Mihringte hman tangkai tura a dah a ni a ti a. Cooperation Society hnuaia mi tamtak, hmasawn tuma intelkhawmte chuan ram tan hmasawnna an la thlen dawn a ni a ti.  LMCS hmalakna kal mek Primary Agriculture  Credit Coop Societies(PACS) ah Account nei  Naupang tam tak an awm  mek a. Hei hi Minister chuan tha a tiin society dangte zinga an hmalaknaah te Naupang te la tel tir ve lo te pawn  entawn se tha nia a hriat thu a sawi a. Sum hlutna, sum khawl pawimawhna leh dik taka thawkchhuak tura rilru dik inzirtirna chu naupan lai atanga inzirtir  a pawimawh ber a ni a ti.

LMCS hi 1997 kum khan din a ni a; tunah hian share holder mi 24 awm mekin  Share 202 lei a ni tawh a, Nominal member mi 505 an awm bawk a. LCMS  in a kalpui PACS-ah hian Account nei mi 525 an awm mek a ni.