No.6840/2020-2021

Vawiin khan Agriculture Minister Pu C. Lalrinsanga hovin a pisaah Video Conference kaltlangin Mizoram District pariata Agriculture Technology Management Agency (ATMA) hotute nen Seed Village Programme kalpui dan thlirhona neih a ni.

Seed Village Programme hnuaia ATMA hmanga Agriculture Department in thlai chi siam leh tihpunna kawnga hma an lak dan thlir ho a ni a. Buh (RMC10713), vaimim, behliang, bekang leh thlai dang engemaw zat chu ATMA kaltanga siam chhuah leh tih pun niin kum 2019-20 chhungin cheng nuai 27.75 senga hmalak a ni.

Seed Village Programme hi sawrkar laipui scheme pawimawh tak niin Mizoram Sawrkar chuan a bawhzui tha hle a. He scheme hmang hian kum thar lama sawrkar programme pawimawh tak tak leh SEDP hnuaia thlai chi mamawh engemaw zat phuhruk theih beisei a ni.

Meeting-ah hian Agriculture Minsiter chuan hrileng avangin eibara intodelh a tul nasa lehzual a, Mizo mipuiten lo leh huan neih lamah rilru pe thar a, intodelh kawng zawh tak tak tura rilru sen thar a tul zia a sawi a. “Kan thlai chi mamawhte state dang atanga lak reng ngai tawh lo tura mahnia intodelh kan tum tawh tur a ni”, a ti. Kumin chhungin Seed Village Programme hnuaiah buh chi quintal 700, bekang chi tha quintal 50, vaimim chi quintal 300, bean chi quintal 50, rajma quintal 200 leh thlai chi dang engemaw zat tharchhuah beisei a nih thu Pu C.Lalrinsanga chuan a sawi a. Heng hian kum thara thlai hi mamawh thui tak a phuhruk theih beisei a ni, a ti.

Meeting-ah hian Aizawl, Lunglei, Lawngtlai, Siaha, Serchhip, Mamit, Kolasib leh Champhai District-a ATMA Project Director ten an hmalakna tarlangin presentation an pe a. Meeting ah hian Dr H.Saithantluanga, Director (R&E); State Nodal Officer, ATMA leh Agriculture officer dang te an tel a ni.