No.6841/2020-2021

Urban Development & Poverty Alleviation Department kaltlanga buatsaih Mizoram Khawpui Fai Inelna 2020 a  ‘Panel of Experts’ te chuan vawiin khan Aizawl Municipal Corporation (AMC) huam chhunga veng hrang hrang an endik hnuah AMC Conference Hall-ah PowerPoint Presentation hmangin AMC huam chhunga faina kawnga hmalakna hrang hrangte inhrilhfiahna leh zawhna leh chhanna hun neih chhunzawm nghal a ni.

Panel of Experts te hi AMC Commissioner Pu K.Laldingliana'n lo dawngsawngin, AMC huam chhunga faina kawnga AMC hnathawh leh hmalakna hrang hrangte a sawizau a. Aizawl chhungah Plastic Waste Management Byelaws chak taka  kalpui a nih thu te, COVID-19 hrileng karah bawlhlawh thliarhran (segregation) chak taka kalpui mek a nih thu te, AMC hnuaia Sanitation Workers 130 hnenah a bika training an pek thu te sawiin; Agro-forestry tih changtlun nan Zonuam Eco-Park-ah Mizoram nauban chi hrang hrang humhim (conserve) a ni thu leh thingkung 1200 an phun zingah 1020 an nung (survive) tih thu te a sawi bawk a ni. 

Panel of Expert-ah hian member pali - Prof. Malsawmliana, Assistant Secretary, CYMA; Dr. Saithantluangi Zote, MIS, I&PR Department; Pi R. Lalrinfeli, Programme  Officer, NGC, Mizoram Pollution Control Board leh Pu Lal Rinmawia, Secretary i/c  Organisation, Mizoram Journalists’ Association te awmin, anni bakah hian UD&PA Department aiawhte an tel bawk a ni.

Tunkum Mizoram khawpui fai inelna endik hi  November ni 23 khan Lengpui leh Sairang-ah bul tanin vawiin hian endikna a tawp ang. He Competition hi Category thuma kalpui niin, category-I-ah district headquarters 11, category-II-ah khawpui (town) dang 12 leh category-III-ah Mizorama khawpui  23 te khaikhawm vek an ni.