No.6842/2020-2021

Vawiin hian Leng Br. YMA Run ah Cooperation Department hmalakna in Pradhan Mantri Van Dhan Yojana (PMVDY) inhrilhriatna leh PMVDY hmalakna hnuaia Khuai bawm semna hun buatsaih a ni a. Pu Lalrinsanga, Registrar, Cooperation Department chu khuallian a ni.

Khuallian chuan, PMVDY chu ramngaw hausakna, thingtlang mite thiamna hmanga haichhuaka hlawk zawka tharchhuah tumna programme a nih thu a sawi a. Mizoramah he Scheme kengkawhtu chu Cooperation Department an nih dan leh an hmalak tawhna tlangpuite a tarlang a ni. Phase I ah Mizoram khaw hrang hrangah Van Dhan Vikas Kendra 44 din tawh niin heng mite tan hian Fund Rs. 581.55 lakh dawn tawh a ni a, tunah hian phase II kalpui tura inbuatsaih leh mek niin hemi atan hian Central chuan Rs. 1725 lakh min pawm sak tawh a ni, a ti. He hmalakna peng pakhat Khuai khawi lamah Leng khuain nasa taka hma an la chu lawmawm a tih thu a sawi a. Khuai khawituten hlawk tak leh mumal taka khuai an khawi theih nan duhsakna a hlan a, taima taka beitute tan chuan sum tam tak thawhchhuah theihna a nih thu a hrilh a ni. Pu Lalrinsanga hian khuai khawitute hnenah khawi bawm hlanna a nei nghal a, PMVDY hnuaia khawi khuaitu chhungkuate hnenah khuai bawm 180 sem chhuah a ni.

He hun hi Pu K. Lalduhawma, Asst. Registrar, Cooperation Department, Serchhip District in a kaihruaia, Serchhip District a PMVDY hmalak tawhna leh ruahmanna awm mek tlangpui report a pe a ni. Pu C. Vanlalhruaia, Asst. Registrar, Cooperation Department, Champhai leh Pu B. Vanlalfinga, VCP, Serchhip te pawhin he hunah hian thu an sawi a ni.