No.6843/2020-2021

Lawngtlai District chhunga Special Summary Revision of Electoral Roll, 2021 kalpui mek endik tura Election Commission of India (ECI)-in a ruat, Electoral Roll Observer Dr Lalzirmawia Chhangte, IAS chuan vawiin khan Lawngtlai a tlawh a. Official leh political party hrang hrang leh tlawmngai pawl ai awhte chu Lawngtlai DC Conference Hall-ah Special Summary Revision of Photo Electoral Roll 2021 kalpui mek chungchang sawipuiin, bial chhunga polling station te a tlawh kual bawk.

Electoral Roll Observer Dr Lalzirmawia Chhangte chuan Lai Autonomous District Council (LADC) Inthlanpui, 2020 felfai taka an buatsaih avangin Lawngtlai DEO leh a thawhpuite chu a lawmpui thu a sawi a. ECI thu rolum pawimawh tak mai, "Vote nei thei reng reng tu mah hmaih loh tur (no voter to be left behind)," tih a taka a puitlin theih nan kum tin electoral roll felfai leh rin tlak nei tura ennawn (revision) buatsaih chu ngaih pawimawh a tul hle a ni, a ti a. Mahni thlalak chuanna voter ID card (electoral photo identity card - EPIC)-ah Mizoram chu zaa za (100%)-in a hlawhtling tawh a, official, political party, tlawmngai pawl leh media te thawh hona leh mipui thu awihna avangin electoral roll felfai tak leh ECI pawhin a chhuan tham kan nei a ni, a ti.

Electoral roll revision kalpui mekah official-te'n theih tawp chhuaha an beih bakah, political party leh tlawmngai pawl atang te'n kum tling thar thun luh leh mitthi leh pem hming paih chungchangah inbengvar tawn a, tan tlan a pawimawh hle a ni, a ti a. Mipui pawhin electoral roll revision chu bengkhawn a pawimawh tiin, hming leh kum ilo dik lo siam that hun lai tak a ni a, kan tihdanglam duh lai erawh finfiahna chiang tak neih a tul a ni, a ti.

Electoral Roll Observer Dr Lalzirmawia Chhangte chuan a hmuh theih chinah Lawngtlai District chhunga electoral roll revision kalpui mek chu a felfai tha hlea a hriat thu sawiin, Lawngtlai District-in final electoral roll felfai leh chhuanawm tak a nei thei dawna a lang chu Electoral Roll Observer a nih angin lawmawm a tih thu a sawi.

DC Conference Hall-a meeting buatsaih hi Lawngtlai Bawrhsap, District Election Officer ni bawk Dr Andrew H. Vanlaldika'n kaihruaiin, Electoral Roll Observer leh kal khawmte lawmna thu a sawi a. Election Officer Pu Lalneihthanga Colney chuan Lai Autonomous District Council (LADC) Inthlanpui, 2020 neih zawh tak report leh Lawngtlai District dinhmun leh special summary revision kalpui mek chungchang report a pe a. Sawi hona leh zawhna leh chhanna hun hman zui a ni bawk.

Lawngtlai District chhungah Assembly Constituency pathum (3) awmin, a zavaiin polling station 181 a awm a. Special Summary Revision of Electoral Roll 2021 atana draft electoral roll chu November ni 16, 2020 khan tlangzarh a ni a. Draft roll atanga a lan danin, 36-Tuichawng (ST) Assembly Constituency (A/C)-ah vote nei mipa 16,379 leh hmeichhia 16,024; an vaiin mi 32,403 an awm a; 37-Lawngtlai West (ST) A/C bialah vote nei mipa 13,612 leh hmeichhia 13,426; an vaiin mi 27,038 an awm a; 38-Lawngtlai East (ST) A/C bialah voter mipa 11,844 leh hmeichhia 12,640; an vaiin mi 24,484 an awm a; assembly bial pathumah hian vote nei mipa 41,835 leh hmeichhia 42,090; an vaiin mi 83,925 an awm a ni.

Special summary revision neih mekah hian dilna leh hnialna (claim and objection) theh lut duh tan December ni 15, 2020 thleng hun hawn a ni a. January ni 20, 2021-ah final electoral roll chu tar chhuah tura ruahman a ni.