No.6844/2020-2021

Vawiin khan Higher & Technical Education Department enkawltu Minister Dr. R. Lalthangliana hovin SEDP hnuaia Higher & Technical Education Board din chu a vawi hnihna atan SAD Conference Hall ah an thukhawm a. Meeting ah hian Board Vice Chairman Dr. Vanlaltanpuia, MYC Chairman ni bawk leh Board Member te bakah leh Official pawimawhte an tel a ni.

Meeting ah hian Rashtriya Uchchattar Shiksha Abhiyan (RUSA) hnuaia College a thawk Associate Proffesor hlawh la theilo a awm te chungchang sawi lan a ni a, Theihtawp chhuaha sawrkar laipui dawr reng a nih thu leh lehkha pawimawhte pawh theh luh a nih tawh thu  tarlan niin, RUSA hnuaia Associate Proffesor hlawh la thei lo a awm mek ten kumin chhunga an hmuh hman ngei beisei a nih thu tarlan a ni.

 RUSA phase 2.0 hman lai mek hi nakkum 2021, March ni 31, a tawp tur a nih thu leh April, 2020 atangin Phase 3.0  kalpui tan ngei a nih a beiseiawm thu tarlan a ni bawk a. Phase 3.0 lo awm tur atana Mizoramin a chhawr tangkai tur rawtna chi hrang hrang pawh sawrkar laipuiah thlen tura hmalak mek a nih thu tarlan a ni bawk.

Mizoram Polytechnic building țawl tawh tuaihnum leh hman tangkai dan tur ngaihtuah a pawimawh thu leh a hmanhmawhthlak thu meetingah hian sawi a ni a. Chak zawka hma lak a nih theih nan Higher & Technical Education Board hnuaiah hian Study committee din nan rel a, Higher & Technical Education Department Addl Secretary in a tul angin hma a la dawn a ni.

Lunglei-a Mizoram University Southern Campus dinna tur chungchang a hma lak tawhna te tarlan a ni a, Mizoram University Southern Campus hmun atan hian Pukpui VC ten ram an pek phal thu tarlan niin, hemi atan hian Sazatlang, Mausen rama ram  hectare 300 a zau chu ruahman phawt a nih thu leh University din thuai a nih theih nan, a dinna tur ram pawh sawrkar dan dinglai ang a landlease thuai a nih theih nan chakzawk a bawhzui nise an ti a ni.

Institute of Advanced Studies in Education (IASE), Aizawl chungchang ngaihtuah niin, Mizorama institution zinga B.Ed. M.Ed, M.Phil leh Ph.D zir theihna awm chhun IASE chu zirtirtu indaihlohna a nasat avanga kalpui chhunzawm a harsat dawn thu tarlan niin, tunah hian zirtirtu (faculty) post 25 awmah zirtirtu 7 chiah an awm thu leh reilote ah an zinga 2 an pension dawn thu tarlan niin, an harsatna zirchiang tura Board in Study Group a lo din tawh te report ngaihthlak a ni a. Study Group rawtna te chu sawrkarah thlen turin ruahman a ni.

Vawiin meeting-ah hian Sawrkar College hrang hrang tihhmasawnna tura hnathawh chi hrang hrangte leh SEDP Fund chungchangte sawiho a ni bawk a ni.