Chief Minister Pu Zoramthanga chuan vawiin khan Kawrthah, Tuidam leh Mamit khawpuiah infiamna leh thalaite hmasawnna ruhrel, cheng vaibelchhe 118 chuang senna tur lungphum a phum. Heng Mamit district tana hmalakna tharte hi Sports & Youth Services Department kaltlanga Pradhan Mantri Jan Vikas Karyakram (PMJVK) hnuaia sum hmuh hmanga thawh tur, a vaiin project pasarih a ni.

Chief Minister chuan Kawrthah ah Residential Sports School (project cost Rs. 3286.34 lakhs) leh Smart Classroom (Rs. 17.54 lakhs) atan lungphum a phum a. Tuidamah Astroturf Football ground (Rs. 532.50 lakhs) phah tur lungphum phum leh in, Mamit ah Residential Sports School (Rs.3286.34 Lakhs), District Sports Complex (Rs. 4496.48 Lakhs), Community Service Centre (Sadvhav Mandab) (Rs.236.00 Lakhs) leh Smart Classroom unit hnih (Rs. 35.08 Lakhs) tan lungphum a phum bawk.

Chief Minister Pu Zoramthanga chuan thalaite hmasawnna tur, an hma hun a nasa taka remchanna (opportunity) siam saktu tur thil thar tha tak tak bultanna chu lawmawm tiin, tangkai thei ang bera hman an nih a beisei thu a sawi a. A thawktute pawhin theihtawp an chhuah se tiin Chief Minister chuan ro tling thil, tualchhung mi mai nilo district pum tana chhenfawm tur thil a nih avangin tha taka sak a puitlin a nih theih nan thawktute chu lo enpui a, lo thawhpui turin khaw mipuite a sawm nghal a ni.

Ram in hma a sawn dawn chuan kawng tha neih a pawimawh hmasak thu Chief Minister chuan a sawi a. Ei leh bara hma kan sawn theih nana ruahmanna hrang hrang hlawhtlin nan kawngpui tha an tul thu te, thei leh thlai thartuten awlsam leh senso tlem thei ang bera an tharchhuahte kawngpui a thlen theihna tur link road tha tak siam te a pawimawh thu sawiin, khawthlang mipuite tan pawh kawng tha tak siam turin hma lak mek zel a nih thu a sawi. Chief Minister chuan COVID-19 hrileng avanga duh anga hma lak theih theihloh chu pawi a tih thu sawiin, boruak ziaawm chhoh zel beisei chungin theihtawp chhuah a nih tur thu a sawi.

Pu Zoramthanga chuan thalaite chu zirna lamah te, infiamna lamah leh kawng dang danga hma an sawn theihna tur zawnsak chu sawrkarin a ngaihpawimawh thu a sawi a. Tunlai khawvelah chuan a remhria apiang tan eizawnna kawng tha tak tak a inhawn zel a, haichhuah tur a awm zel thu sawiin, hlawhtling tur erawh chuan tawrhchhel leh taimak a pawimawh thu a sawi bawk a ni.

Sports and Youth Services Minister Pu Robert Romawia Royte chuan Mizoram khawthlangah infiamna ruhrel tha a awm ve lo chungin sports discipline hrang hrangah Zoram leh India huap pawha lang pha thalai tam tak an chhuah tawh thu a sawi a. Vawiina hna tanna tur lungphum phum tak projects te hi thawhzawh a nih hunah chuan Mizo hnam tana chhuanawm thalai tam tak khawthlang atanga an lo chhuah a rin thu a sawi. Sports Minister chuan sorkarin sports leh kawng danga thalaite hmasawnna a ngaihpawimawh avangin Zorama la awm ngailo Mizoram Sports Policy 2019 a siam te, sports chu Industry Status pek a nih tak thu sawiin, hei hi hmasawnna intanna leh Central Sorkar pawhin phur taka hmasawnna sum min pek duh chhan a ni a ti.

Chief Minister tawiawmtu Deputy Govt. Chief Whip, Dampa bialtu MLA ni bawk Pu Lalrintluanga Sailo te, Mamit bialtu MLA Er. H. Lalzirliana leh Sports, Youth Affairs & Tourism Development Board Vice-chairman Pu TC Pachhunga te pawhin thu sawiin, sawrkarin Mizoram pum leh a bik taka khawthlang thalaite hmakhua ngaia infiamna khawvelah leh kawng hrang hranga hma an sawnna tur kawng sial sak a ni chu lawmawm an tih thu an sawi a ni.

Vawiin lungphum puala khaw pathum a inkhawm buatsaihte SYS Secretary Pu H. Lalengmawia chuan kaihruaiin, Mizoram State Sports Council Secretary Pu John Tanpuia hnen atangin technical report ngaihthlak a ni. Mamit DC Dr. Lalrozama pawhin Mamit district thalaite tana hmalakna ropui leh tangkai tak tur bultan a ni chu lawmawm a tih thu a sawi a. Kawrthah, Tuidam leh Mamit khawtlang aiawhten lawmthu an sawi bawk. He hunah hian Mizorama Sports Association hrang hrang inzawmkhawm United Sports Association of Mizoram President leh Mamit District Sport committee aiawh te pawhin Sports infrastructure tha Mizoramin a neih thar dawn avangin lawmthu an sawi a ni.

• Mamit leh Kawrthah a Residential School-ah hian academic building bakah mipa leh hmeichhe tan hostel mi 100 awm theihna ve ve, multipurpose hall, astro football turf, principal leh staff quarters te, basketball leh volleyball court te leh RCC tuizem lian te awm tura ruahman a ni ve ve a. Mamit leh Kawrthah a Residential School sakna atan hian 1st Installment Rs. 1478.85 Lakhs ve ve dawn tawh a ni.

• Smart Classroom hi zirlai ten tunlai thiamna (Internet Technology) hmanga lehkha an zir theihna tur atan ruahman niin, internet thlun zawmin Computer, Printer, Television (TV) te dah tur a ni a. Kawrthah leh Mamit khawchhunga school thlanbik ah te buatsaih a ni ang.

• Mamit District Sports Complex siamna tura tana Rs.4496.48 Lakhs approved tawh atangin 1st Installment Rs.2023.41 Lakhs hmuh tawh a ni a. He project chhunga hna hrang hrangte chu Synthetic Football Turf and Pavilion, Synthetic Athletic Track, Multi-sports Indoor Stadium, Indoor Shooting Range, Boxing and Contact Sports Centre, Gymnasium leh Dormitories & Training Facilities a ni.

• Mamit Community Service Centre tur hi building 25 x 13.5 sq metre a lian tura duan niin, chhawng hnih a sak tur a ni a. Hetah hian Basement Floor-ah Computer Room, Office leh Committee Room-te dah in, Ground Floor-ah Public Meeting Hall cum Badminton Hall dah tur a duan a ni a, Mid level-ah Table Tennis khelhna tur hmun siam tel niin, Changing Room leh Toilet-te ruahman a ni bawk.

• Tuidam khelmual ah Laldenga Football Ground siam a ni dawn a. Phullem (artifical turf) phahin, Rs. 532.50 lakhs sanction atangin 1st Installment Rs.239.62 lakhs, Ministry in a pechhuak tawh a ni. FIFA 2 Star standard-a siam tura duan a ni a. Playground sirah hian mi 100 vel lenna Pavilion siam tur ni bawkin, player changing room pahnih dah tel tura a ni bawk. Artificial Football Ground hi a kual chhuakin tha taka hungna (security fencing) siam tur a ni.