2153/2022-2023  

Aizawl 2^nd October 2022: Nimin October Ni 1, 2022 (Inrinni) khan Bangalore Mizo Association (BMA) huaihawti Bangalore Mizo Vangpui Kut chu hman a ni. Agriculture, Irrigation and water resources leh Coooperation changtu Minister Pu C. Lalrinsanga chuan Khuallian niin Kut hi a hmanpui.  Dr. HT Sangliana, IPS(Rtd)/Ex-MP te nupa chu Kut Nu leh Pa an ni.

Kut hawnna atan Kut Nu leh Pa, Dr. HT Sangliana te nupa, Khuallian Pu C. Lalrinsanga leh BMA President Pu Lawmna Kima ten Darkhuang an vua.

Khuallian Pu C. Lalrinsanga chuan Kut thuchah sawiin Bangalore Mizote Vangpui KUT chibai a buk a.  Bangalore kan tih apianga kan hriat lar em em, Pu HT Sangliana chu Mizote tan a hlu a, hmaichhana an inhmu thei chu lawmawm a tih thu a sawi. Pu Sangliana ropuina ber, dikna, taihmakna leh rinawmna hi hre reng ang u tiin Kut hmangtute a chah a. Rinawmna leh dikna hmachhuana hna  thawk a kan nun kan hman  chuan kan hlawhtlingin chhenfakawm kan ni zel thei dawn a ni a ti. Ram intodelh lo kan nih avangin intodelh turin theihtawp kan chhuah a ngai a, sawrkar hna in min daih vek lo a, entrepreneurship lamah hian hma kan sawn zel a ngai a, mahni kea ding turin zau zawk kan thlir zel a ngai a ni. Khawi hmunah pawh awm ila Mizo hnam leh ram hmasawn theihna turin theihtawp i chhuah zel ang u tiin Minister chuan Bangalore Mizote hnenah fuihna thu a sawi a. 

Bangalore-a Mizote'n Mizoram House neih hlan an nghakhlelh zia hriain  a hmunhma pawh a tlawh tawh tin sawiin, Mizoram House an mamawhna thu chu Council of Ministers meeting ah Chief Minister hnenah pawh a thlen tawh thu leh Fund neih theih dan tur pawh Chief Minister nena an   sawi dun tawh thu te,  SASCE (Special Assistance to States for Capital Expenditure) atanga Bangalore Mizoram house sakna tur ruahman a nih theih dan an sawi dun tawh tih a sawi a. Bangalore Mizoram House sakna tur hi ruahman thuai a nih ka beisei a ti. 

Kut Pa, Dr. HT Sangliana chuan Khuallianah Pu C. Lalrinsanga an nei chu lawmawm a tih thu a sawi a. Kan ram hruaitute'n Bangalore min rawn tlawh a, Kut hlimawm tak hmang thei tura ruahmanna min siampui chu lawmawm hle a ni a ti.

BMA President, Pu Lawmna Kima’n Kut thuchah tawi a sawi a, Bangalore Mizo Community chu  kum 70 chuanga upa a ni tawh a. Bangalore chu Mizote zirna leh hnathawhna hmunpui, kan Pastorte Pathian thu zirna hmunpui ber leh Corporate hub a nih avangin  Mizote tan khawpui pawimawh a ni a ti. Tunah hian Bangalore khawpuia Mizo 3000 chuang kan awm mek a, hun rei tak atanga kan lo nghah tawh Mizoram house sak hlan kan nghakhlel hle tawh a ni a ti. Kan Khuallin, Agriculture minister hian Bangalore Mizote min ngaihsak hle a, Mizoram house sakna tur hmunhma kum 2015 a lei tawh la sak loh chu a hmunah min enpui a, sak puitlin a nih ngei theih nan theihtawpin hma min lakpui hi lawmawm kan ti hle a ti. Covid laia Mizoram sawrkarin Bangalore Mizote a tanpuina ah lawmthu a sawi bawk.

Vangpui Kut hi Kum 30 kal ta atang khan Bangalore Khawpuia Mizoten Thalfavang Kut tiin an lo hmang tan a, a hnuah Vangpui Kut tia hman chhunzawm a ni. Bangalore-a Mizo chengte hunpui ber niin Covid hripui avanga kum hnih he KUT hi an hman theih tawh loh hnuah kumin aṭang hian hman leh a ni a, Bangalore Mizote an phurin Kut tel pawh an thehnem hle. Kut chhim zawng zawng hi mi 1100 chuang an ni.

Kut hmang tur hian Bangalore Mizote bakah Karnataka leh a chhehvela Mizote an lo kalkhawm ve bawk a, he hun hi an hlut hle. Zaithiam Pi Rebecca Saimawii, Pi Lalruotmawi leh Tv. K. Hminga ten zaiin Kut hmangtute an awi a, Mizoram Got talent a pakhatna Tv. Rindika Zadeng pawhin rimawi a tum a.

Kut hman thin dan angin BMA section hrang hrang intihsiakna - mipa solo, hmeichhe solo, Zaipawl leh Debate intihsiakna te neih a ni.