2154/2022-2023
Aizawl, 3rd October, 2022 : Tukin Dar 6:45 khan Sports & Youth Services Minister Pu Robert Romawia Royte-chuan A.R. Ground, Aizawlah Fit India Freedom Run 3.0 chu khuallian niin a hawng. Fit India Freedom Run 3.0 hi Mizoram State Sports Council (MSSC) in an huaihawt a ni.

Khuallian Pu Robert Romawia Royte chuan India ram chu ram in fit leh hrisel kan nih theihnan kum 2019 atang khan beihpuithlak tan a nih thu sawiin, Mizoramah pawh August ni 29, 2019 khan Deputy Chief Minister Pu Tawnluia hovin a thawhkhatna hman a ni a, kum 2020 khan a thawh hnihna hman leh niin COVID-19 hruipui leng vangin kan han khaihlak hlek a, kuminah a thawh thumna kan hmang thei ta hi a lawmawm hle a ni, a ti. Khawvel ram changkangte chuan taksa infit hi an ngaih pawimawhna a rei tawh a, India ram pawh hetiang kawngah hian harh tharin, nasa takin tan a la a, infiamna (sports) huangah pawh nasa taka hma lain Mizoram ngei pawhin a hlawkna leh a hlawhtlinna kan infiammite atangin kan hmu tan ta a ni, a ti a. Naupangte leh infiamna lama tuite tan sawrkarin kawng a hawn belhsak zel dawn a, a thlahthlam dawn lo tih a sawi bawk a ni.

Pu Robert Romawia chuan infit tura taksa insawizawi (exercise) hi kan nitin nunphungah kan behtir a, habit tha tak atana kan neih theuh a pawimawh a, nitin darkar chanve tal taksa insawizawina atana hun kan pek theih chuan kar lovah a hlawkna kan tel nghal dawn a ni, a ti a. Taksa a infit chuan kan hrisel ngei ngei a, natna tam tak kan buaipui zunthlum, thisen sang etc., lakah thui tak min veng thei bawk a, kan thluaka thisen zam a kal that avangin keimahni pawh kan phurin kan thluak pawhin chak zawkin hna a thawk thei dawn a ni, a ti a. Pathianin taksa min pek enkawl uluk hi kan mawhphurhna a nih tel ve tho bawk avangin taksa insawizawi hi a Pathian thu bakah kan tih ngei ngei tura kan ngaih a pawimawh hle a ni, a ti a. Taksa hrisel, rilru hrisel nei turin leh Mizo hnam te hi India rama fit ber ni tura tan la zel turin mipuite a chah bawk a ni.

Fit India Freedom Run 3.0 ah hian Grassroot Football Academy 9, Non-Residential Coaching Centre hnuaia sports discipline 5, Sports Association hrang hrang, SAI Centre, USAM leh MSSC bakah midang thahnemtak an tel a, zing dar 5:45 ah Chanmari kawn leh Sikulpuikawn atanga tlan tanin A.R. Ground an pan a, kawng laka bawlhhlawh awmte an chhar fai nghal ni. Chanmari kawn atang hian Pu John Tanpuia, Secretary, MSSC in a vailiam a, Sikulpuikawn atang hian Pu K.Lalrohlua, Director SYS Department in a vailiam thung a ni.

A.R. Ground-a an intawhkhawm hnu hian Fit India Freedom Run 3.0 hawnna inkhawm neih a ni a, hetah hian Dr Lalrozama, Secretary, SYS Department in inlawmna thu a sawi a, Khuallianin thusawi paha Fit India Freedom Run 3.0 a hawn hnuah Pu TC Pachhunga, Vice-Chairman, SYS Development Board in lawmthu sawinain hun a khar a ni.

He hunah hian Dr K. Pachhunga, MLA & Vice Chairman Bamboo Devolopement Board, Er. H. Lalzirliana, MLA & Vice Chairman, Road & Infrastructure Development Board, H. Biakzaua, MLA & Vice-Chairman, Agriculture Development Board, Sports & Youth Services Department officialte, Mizoram State Sports Council, United Sports Association of Mizoram aiiawhte leh sawm bik mi thahnemtak an tel a ni.