Agriculture, Cooperation etc changtu Minister leh Lunglei West bialtu MLA ni bawk Pu C. Lalrinsanga chuan kar hmasa ruahsur nasa avanga College Veng Lungleia lei tlahniam chu a hmunah kalin a enfiah a, chhiat tawk chhungkuate hnenah tanpuina a hlan nghal. He hunah hian a kaihhnawih sawrkar official-te bakah Lunglei MJA, khawtlang hruaitute leh tlawmngai pawl te an tel.
Pu C. Lalrinsanga chuan khuarel chhiatna avanga College Venga harsatna tawk an awm tih a hriatin pawi a ti hle a, he vanduaina thleng avanga mangang chhungkuate thinlung taka a tawrhpui thu a hrilh. Sawrkar, tlawmngai pawl leh khawtlang hruaitute tangkawpin chhanchhuah leh chhawmdawl hna tha taka an kalpui avangin an chungah lawmthu a sawi bawk. Ruahtui leh thli avangin chhiatna nasa zawk ala thleng palh thei a, heng chhiatrupna hmachhawn tur hian tha taka kanlo inpuahchah lawk a tul takzet a ni tiin official, khawtlang hruaitute leh tlawmngai pawl hruaitu kalkhawmte chu an hmanrua leh sum mamawhte inthlahrung hauh lova a rang lama a hnena thlen turin a chah a ni.
College Veng lei tlahniam nasa avang hian in dinglai pasarih (RCC pahnih leh Assam Type panga)-te chu luah ngam a ni tawh lova, kar hmasa July ni 13, Inrinni zing karah khan chhungkaw 12 zet an inthiar chhuak a. State Disaster Response Force (SDRF) te kaihhruaina hnuaiah thiah tura hmalak mek a ni.
Lunglei District huamchhungah chhiatna engemawzat thleng mek in Khawthlang Tuipui lian avangin chhungkaw 700 (mi 3512) velin an chenna in an chhuahsan tawh a, heng te hi Relief Camp 12 ah sem darh an ni. Hnahthial ah chhungkaw panga (5) in thiar chhuak tawh in College Veng Lungleiah in pasarih (7) atangin chhungkaw sawm pahnih (12) an in thiar chhuak tawh bawk a ni. Hemi bakah hian Zotlang, Zohnuai, Zobawk, Luangmual khaw chhung hmun danga leiminte leh kawngpui hmun hrang hrangah leimin a awm bawk a ni. Minister hian Lunglei a cham chhungin leimin leh lei tlahniam te a hmuna kala enfiah zui a tum bakah naktuk 19th July 2019 chawhnu dar 1:00 ah Sawrkar official te nen Disaster Management chungchang meeting an nei dawn a ni.
