No.3331/2020-2020  

Vawiin khan Agriculture Minister Pu C.Lalrinsanga chuan  Mission Organic Mizoram (MOM)  hnuaia Farmer Producer Company pathum hnenah Organic Certificate hlanna Agriculture Department Committee Room-ah neiin, khuallian a ni. Deputy Chief Whip Pu Lalrintluanga Sailo chu khualzahawm a ni.

Khuallian Pu C. Lalrinsanga chuan thu sawiin Farmer Producer Company (FPC) ten kawng chi hrang hranga endikna paltlanga Organic Certificate an dawng thei chu a lawmpui tak zet a, Mizoram tan pawh mellung pawimawh tak a ni, a ti a. Organic Certificate chu inthlahdah vanga hun rei lote chhunga hloh leh theih a nih avangin, engtiklai pawha tha thlah lova kal zel turin FPC te a chah a. Kut dawh rilru pu lova, India ram mai ni lo, khawvel huapa sumdawnna kalpui ve thei ngei turin FPC te a fuih bawk a ni.

Khualzahawm Pu Lalrintluanga Sailo pawhin Organic farming kalpuituten rinawm taka Organic thlai tharchhuah kawnga hma an lak zel a pawimawh thu te sawiin, Mizoram a Organic thlai tharchhuahte khawl hmanga endiknaah Chemical an hmu a nih chuan, harsa taka din, Company chu awlsam takin a tluchhe mai dawn a; rinawm leh dik taka hna thawh a pawimawh reng dawn a ni, a ti. 

Deputy Chief Whip hian Organic Production Manual, Clover Organic Pvt., Ltd a tlangzarh nghal a ni.

MOM hnuaia Farmer Producer Organisation (FPO) pathum (3) – Reitlang Organic Producer Company (ROPCO), West Phaileng Block Bird Eye Chilli Grower Society leh Turmeric Grower Group, Kolasib te hnenah Organic Certificate hlan an ni.

He hun hi Pu Lalhmingthanga, Commissioner & Secretary, Agriculture Department chuan a kaihruai a, Dr. H. Saithantluanga, Mission Director, Mission Organic Mizoram chuan lawmthu sawiin he hun hi a khar a ni.

Organic Certificate nei tur hian Farmer Producer Company te hian fiahna kalkawng thui tak an paltlang a ngai a, a tlem berah kum 3 chhung tal fiahna hrang hrang paltlang ngai a awm a ni. FPO dang sawm leh pakhat (11) te pawhin Organic Certificate hi neih ve thuai tumin nasa takin hma an la mek bawk a ni.