No.3330/2020-2020    

Vawiin chawhma dar 11:00 AM khan DC Conference Hall Kolasib ah FOCUS hnuaia District Level Coordination Committee(DLCC) chu Dr. H. Lalthlangliana, Deputy Commissioner, Kolasib District kaihhruaina hnuaiah Meeting neiin; FOCUS hnuaia Innovation Fund chungchang leh MGNREGA leh Line Departments-te nena thawhho dan tur chungchangte sawiho a ni.  

Dr. H. Lalthlangliana, Deputy Commissioner chuan FOCUS hmalaknate chu khawvel boruak lo danglam zelah kan ei leh bar zawnna atana a pawimawh zia sawiin, FOCUS hmalakna hrang hrangte tihhlawhtlin a nih ngei theihna tura thahnemngai taka thawk turin kalkhawmte a sawm a. Hmalaknate chak lehzuala kalpui a nih theih nan Sawrkar Department hrang hrangte nena thawhho that a pawimawh thu a sawi bawk.

Pu J. Rothanga, District Project Manager leh DAO, Kolasib District chuan 2020-21 chhunga FOCUS hmalaknate leh harsatna hrang hrangte awm te a report hnuin FOCUS hnuaia Innovation Fund hman dan tur leh a kalphung sawifiahna a nei a. Rural Development Deptt. hnuaia MGNREGA bakah line department dang tam zawkte nena in converge theih dan zawn a tul thu a sawi bawk.

Pi Hmangaihzuali, Deputy Director, Horticulture Deptt. chuan Innovation Fund chu inkaihhruaina duan sa hmanga Loneitute tharchhuah hlawk zawk a sawngbawlna kawng pawimawh a nih thu sawiin hemi atana hmalak dan tur leh Training in pek dan tur te a sawi bawk.

FOCUS Innovation Fund hmanga hma la duhte chuan an hmalak duhnate District Management Unit(DMU)-ah thehlutin hmalakna kalpui tur(Final Selection) hi Project Management Unit(PMU), Aizawl-in a lo thlang dawn a ni. FOCUS Innovation Fund atan hian mimal, pawl leh Co-operative Societies te tan dilna thehluh theih a ni ang.

He meeting-ah hian FOCUS project leh Sawrkar Department-te bakah Scheme leh Programme dangte nena thawhho dan tur sawi a ni a. Ruahhmanna hrang hrangte chu kuthnathawktute tana tangkai tur leh a hun bi dik taka thawh hman tura rel a ni.

Meeting-ah hian Kolasib District chhunga FOCUS project kaihhnawih Line Deptt. hrang hrang hotute  bakah Project Management Unit, Mizoram atangin Pi Lalhmangaihzuali, Deputy Director, Horticulture Deptt. leh PMU officials dangten an telpui bawk a ni.