Vawiin khan Hauruang Community Hall-ah Hauruang VC leh All NGO tangkawp buatsaihin Zirlai Hlawhtling Chawimawina program neih a ni a. Agriculture Department etc changtu Minister leh bialtu MLA ni bawk Pu C. Lalrinsanga’n a hmanpui.

He hun Pu Zothanmawia Sailo, VC Vice President kaihhruaiah Minister chuan thu sawiin zirlaite hmakhua ngaia anmahni chawimawina leh fuih tharna program tha tak buatsaihtu Hauruang VC& All NGO te chungah lawmthu a sawi a. Zirlai pass tharte chu tum mumal nei a, chhungkua, khawtlang leh ram tana chhawr tlak nih tum turin a chah a. UPSC leh MPSC bakah Govt. of India hnuaia hna thawh tur tam tak awm te ngaihven tur leh, Mizoram tana an tangkai theihna tur thlir chunga thahnemngai lehzual turin fuih a ni. A sawi zelnaah Minister chuan zirna a ngaih pawimawh takzet thu leh zirna lama ke pen duh leh thiamna nei, amaherawhchu chhungkaw dinhmunin a zir loh avanga sum tanpuina mamawhte pawh a theihtawpa alo tanpui thin tawh leh tanpui zel tur pawha a inhawn thu a sawi a. Zirna sang zawk beih chhunzawm duh, sum leh paia harsatna nei te chu inthlahrung hauh lova a hnena an harsatna thlen tura chahin mi taima leh tum tak takna rilru pu zirlaite a theih anga tanpui zel a duh thu a sawi. Tin, Hauruang chhunga zirna in te infrastructure- building leh a kaihhnawihte ti changtlung zel tura hmalak a tum thu a tarlang bawk.

A Department chan hnuaia hmalaknate pawh sawilangin Minister chuan Mizoramin Agriculture-ah hmasawnna tur rahbi kan nei a ni tiin ram changkang zawkte tih dan leh hriselna atana pawimawh tak ‘Organic Farming’ uar taka kalpui tum a nih thu a sawi a. Hemi chungchang hmalakna kal mekah hian tun thla khan Germany-a International Workshop on Organic Policies a zuk tel thu leh Delhi ah DoNER Secretary Dr. Inderjit Singh nen hmalak dan tur an ngaihtuah thu a sawi.

Vawiin Zirlai Hlawhtling Chawimawina program ah hian zirlai 20 chawimawi niin HSLC pass thar mi 14, HSSLC pass thar mi 4, BA pass thar mi 1 leh BCA pass thar mi 1 te an ni.