Aizawl DC's Conference Hall-ah vawiin chawhnu khan Aizawl District Bawrhsap Pu Vanlalngaihsaka, Aizawl District Election Officer ni bawk chuan Novem ni 5 a Sinlung Hills Council inthlan vawikhatna lo awm turah thawhho dan tur NGO te a sawipui a. He hunah hian Mizoram People Forum(MPF), Hmar Inpui,  MHIP leh MUP aiawh te an tel a ni.

Meetingah hian Sinlung Hills Council Election atana inpuahchahna te   Addl DC Pu VL Hruaizela Khiangte, Dy DEO ni bawk  leh Pu Lalfakzuala, Election Officer te hnen atangin ngaihthlak a ni a. Hemi hnuah hian MPF hmalaknate leh sawrkar thawhpui an tum dan te  Rev.R.Lalliantluanga hnen atangin ngaihthlak a ni leh a ni.

 Meeting kaihruaitu DEO Pu Vanlalngaihsaka chuan SHC inthlan lo awm tur chu a vawikhatna a nih angin election process pawh uluk taka kalpui a nih thu leh polling station zawng zawngte pawh a hmuna tlawhin  endik mek a nih thu a sawi a. Tun tum inthlanah hian EVM hman a ni dawn lova Paper Ballot hman a ni thung dawn tih a sawifiah a. Vote nei zawng zawng te vote thlak vek tura sawmin EPIC ti bo palh emaw hmu zo lo tan pawh Aaadhar, Ration Card emaw Identity Card sawrkarin a pawm te hmangin vote an thlak thei tho dawn a ni a ti. Vote tlak zawh veleh Vote chhiar nghal a ni dawn a tih a sawi a.  Boruak muanawm tak hnuaiah inthlanna felfai tak a awm theih nan NGO  te leh a bikin MPF te thlawpna a pawimawh leh hle dawn a ni a ti.

Tunah hian SHC huam chhunga khua awm(Constituent Village)te hi Sector Magistrate ten uluk takin an vil mek a. Campaign hun pawh November 3 Tlai dar 4-ah tihtawp a ni dawn a. MPF lam te pawh Team 4-ah insiamin inthlanna felfai taka kalpui a nih theih nan SHC huam chhungah khuaah te zin kualin mipui zirtirna an pe mek a ni.