Agriculture Minister Pu C.Lalrinsanga chuan a Department chan – Agriculture, Irrigation & Water Resources leh Cooperation Department-te hmalakna hrang hrang a hmuna enfiah tur leh kuthnathawktute ti hmasawn zel tura ruahmanna siam tulte ngaihtuah pui turin nimin khan Huisih Zau, Haulawng a tlawh.

He hunah hian Cooperation Department Addl RCS Pu Lalrinsanga, Lunglei DAO Pu Tlangtimawia Zote leh a thawhpuite, I&WR SDO Er Lalsangzuala leh a thawhuite bakah khawtlang hruaitute leh Huisih Zau Field Management Committee (FMC) leh leilet neitute telin Minister ho hian Agriculture leh Irrigation & Water Resources hmalakna te an enfiah a. Irrigation & Water Resources hmalaknaa siam ‘Awmthawt Lui Diversion Weir’ chu kuthnathawktuten tangkai taka an hman mek thu leh hemi kaltlanga tui hnianghnar zawka pek chhuah chuan buh thar pawh nasa taka a tih pun thu report ngaihtlak a ni a. Tin, hmun thenkhatah tui kawng ala that tawkloh avangin chhungkaw engemawzatin leilet an siam theihloh thu leh Irrigation channel tih changtlung zel an mamawh thu te Minister hnenah hian anlo thlen a ni. Huisih Zau ah hian thlai chinna atana hman theih ‘Culturable Command Area’ ram 42 hectare a zau a awm a, Irrigation & Water Resources Department hian kum 2006 atang khan helai hmunah hian hmalakna an kalpui a ni. 

Hemi puala inkhawm tawi neih Zau FMC Secretary Pu Lalruatsanga kaihhruaiah Agriculture Minister chuan Huisih Zau kuthnathawktute hmalakna leh thawhrimnate a hmunah ngei a hmuh pui thei chu vannei a in tih thu a sawi a. Kuthnathawktut hnenah fuihna thu sawiin kum khatah buh vawihnih thar thei tura theihtawp chhuah turin a chah a. Mizoram hmun hrang hrang Buh thar theihna potential area-ah te land levelling tih tum a nih thu sawiin a bik takin ramri depah te uar taka hmalak tum a nih thu Agriculture Minister chuan a sawi. Kan ram hmasawnna tur leh kan economy chawikang zel turin kuthnathawktute an pawimawh takzet a ni tiin kuthnathawktute chu taima tak leh phur taka sawrkar hmalaknate tawiawm chhunzawm tur leh sawrkar leh Department-te finchhuah fo turin a chah a. Department kaltlanga hmanrua a ndawn te chu tangkai taka hmiang tur leh official-te nen inhriatthiam tawnna boruak tha hnuaiah thanhnemngai taka hnathawk ho zel turin duhskana a hlan a ni. 

Huisih Zau ah hian chhungkaw 15 in 14 hectares ah buh an ching mek a, kuthnathawktute hian taima taka hma la in, Department in uluk takin a vil reng a. Huisih Zau ah hian nikum khan buh 23 MT an thar a, kuminah 31 MT an thar a ni. Sawrkar laipui policy Pradhan Mantri Krishi Sinchai Yojana (PMKSY) hnuaiah an hman tur tanky panga (5) buatsaih a ni tawh a. Helai hmun panna Link Road hi 2014 khan Rashtriya Krishi Vikas Yojana (RKVY) Scheme atangin siam that a lo ni tawh bawk a ni. Tin, Agriculture Department kaltlangin tun hnai khan custom hring hnuaiah tractor an dawng bawk a ni.